Үндсэн хуульд ҮХН-ээр дамжуулан “өөрчлөлт” оруулж, засгийн газрын гишүүдийн олонхийг нь “давхар дээлтэй” сайдуудаар томилсон Ерөнхий сайдын шинэ багийнхан өөр хоорондоо мэдээллээ солилцож, нэг шийдэл ойлголцолд хүрээгүй эсвэл өөрсдийн бүрэн эрхэд хамаардаг агентлагаа өгнө өгөхгүй, тараана тараахгүй гэсэн маргаанаа эцэслэж чадаагүй юмуу гэмээр мэдээллүүд гарч эхэллээ.
2022 оны 09 дүгээр сарын 06-ны өдөр хуралдсан Засгийн газрын хуралдааны шийдвэрийг ЗГХЭГ-ын дарга Д.Амарбаясгалан танилцуулахдаа “Төрийн хүнд суртлыг бий болгож байгаа давхардсан чиг үүрэг, бүтцийг цэгцтэй болгох хүрээнд 2023 оны нэгдүгээр сарын 1-нээс Мэргэжлийн хяналтын ерөнхий газрын чиг үүргийг өөрчлөн зохион байгуулахыг Ерөнхий сайдын зүгээс үүрэг болголоо.
Ирэх оны улсын төсвийг УИХ-д өргөн барихдаа энэ өөрчлөлтийг тусгана” хэмээн Мэргэжлийн хяналтын байгууллагыг татан буулгаж, чиг үүргийг нь салбар яамд ру хамааруулах болсон гэдгийг ямарч хоёрдмол утгагагүйгээр хэлсэн.
Гэтэл маргааш нь буюу 2022 оны 09 сарын 07-ны өдөр Шадар сайд С.Амарсайхан www.uzeg.info сайтад ярилцлага өгөхдөө “Мэргэжлийн хяналтын байгууллагыг татан буулгах уу” гэсэн сэтгүүлчийн асуултанд хариулахдаа “Тийм юм байхгүй, мэргэжлийн хяналтын байгууллага өөрөө байх ёстой байгууллага. Эрүүл аюулгүй орчинд амьдарч ажиллах иргэдийн баталгааг хангадаг байгууллага” хэмээжээ.
Эндээс харахад Засгийн газрын бодлого нэг чигтэй байна уу, эсвэл амбици ихтэй сайдууд өөр өөр зүйлийг бодож төлөвлөж явна уу гэдэг нь тодорхой биш байгаа бололтой.
Б.Бат-Орших
