Өчигдөр Монгол Орос хамтарсан сургуулийн захирал Ж.Соронзон мэдээллийнхээ үеэр сэтгүүлчийг ялгаварлан гадуурхах үйлдэл гаргасан. Үүнтэй холбоотойгоор холбогдох яам болон Засгийн Газар тус сургуулийн захирал Ж.Соронзонг ажлаас нь чөлөөлөх шийдвэр гаргалаа. Энэ талаар ЗГХЭГ- ын дарга Д.Амарбаясгалангаас тодруулав.
ЗГХЭГ-ийн дарга Д.Амарбаясгалан: “Монгол Улсын иргэн үндсэн хуулиараа олгогдсон үндсэн эрхээ бүрэн дүүрэн эдэлдэг, хамгаалуулдаг байх ёстой. Хуулиндаа гарал үүсэл, яс, угсаа зэрэг зүйлсээр ялгаварлан гадуурхагдадгүй байх ёстой. Тэгтэл өчигдөр Орос 3-р сургуулийн захирлын хийсэн мэдэгдлийг бид хараад МУ-ын ЗГ-ын баримталж ажилладаг зарчимтай нийцэхгүй байна гэж ойлгож байна. Өнөөдөр БШУ-ны сайд шийдвэрээ гаргаад ажлаас нь чөлөөлөх тушаал гаргасан. Надад тушаал нь ирсэн байна. Өнөөдөр энэ тушаалыг хүлээлгэж өгнө. Энэ асуудал шийдэгдэх ёстой. Нэг ёсондоо Монгол Улсад амьдарч байгаа иргэн үндсэн хуулиар олгогдсон эрхээ эдэлж байх ёстой. Төрийг төлөөлөөд аливаа шатанд ажиллаж ажил үйлчилгээ үзүүлж байгаа этгээд ямар нэгэн байдлаар үндсэн хуулиар олгогдсон эрхүүдийг зөрчих эрх байхгүй. Өчигдөрийн мэдэгдэл дээр бол үндсэндээ ардчилсан нийгмийг цогцлоох гарал үүслээр нь ялгаварлан гадуурхахгүй байх гэдэг үзэл санааны эсрэг мэдэгдлийг Ж.Соронзон захирал хийсэн учраас бид ажлаас чөлөөлөх шийдвэр гаргаж байна.
Энэ үйлдэл нь ялгаварлан гадуурхалтыг олон нийтийн дунд бодитой харуулсан. Арга барилын хоцрогдлыг маш бодитой харуулж байна. 21-р зууны ард иргэдтэй 21-р зууны арга барилаар харьцаж, тэдэнд төр үйлчилгээгээ үзүүлж байх ёстой гэдэг зарчимын эсрэг үйлдлийг гаргасан учраас бил хариуцлага тооцох ёстой.
Сэтгүүлч захирал хоёрын хооронд маргаан бол тусдаа асуудал тэр нь хууль шүүхийн байгууллагуудаар ороод нэг мөр шийдэгдэх ёстой.
Энэ бол Монгол улсад үйл ажиллагаагаа явуулж байгаа Монгол хүүхдүүдийг сургаж байгаа сургууль учраас Монгол Улсын Үндсэн Хуулинд нийцэж үйл ажиллагаагаа явуулах ёстой гэдгийг баримталж ажиллана. Энэ шийдвэрийг Оросын тал ойлгоно гэж найдаж байна” гэлээ.
Г.Бүжинлхам
