Өнөөдрийн НИТХ-ын ээлжит хуралдаанд хэлэлцэх асуудлын жагсаалтад замын түгжрэлтэй холбоотой асуудал ороогүй гэж НИТХ-ын дарга Ж.Батбаясгалан мэдээллээ.
Тэрбээр: “НИТХ-ын ээлжит хуралдаанд хэлэлцэх асуудлын жагсаалтад замын түгжрэлтэй холбоотой асуудал албан ёсоор багтаагүй .Өнөөдрийн хуралдаанаар Хотын Засаг дарга болон Иргэдийн Төлөөлөгчид бүгд энэ асуудлыг хэлэлцэх хүсэлтэй байгаагаа илэрхийлсэн боловч Монгол улсын засаг захиргаа, нутаг дэвсгэрийн нэгж түүний удирдлагын тухай хуулинд зааснаар хуралдаанд хэлэлцэх асуудлын захирамж гарчихсан учраас шийдвэр гаргах түвшинд хэлэлцэх боломжгүй . Харин Засаг дарга санал гаргасны дагуу зөвхөн сонсож танилцах боломжтой. Мөн Захиргааны Ерөнхий хууль болон бусад хууль тогтоомжийн хүрээнд олон үе шатыг давах шаардлагатай байдгаас хамгийн түрүүнд иргэдээсээ санал асуулга авах хэрэгтэй. Тийм учраас заавал иргэдийн хэлэлцүүлэг явагдаж иргэдийн саналыг тусгаж байж тогтоолын төсөл өргөн баригдах ёстой” гэв.
