Ираны Баруун Азербайджан мужийн шүүх ЛГБТ хөдөлгөөний хоёр идэвхтэнд Шариатын хуулиар “бузар булайг түгээсэн” хэргээр цаазаар авах ял оноолоо. Энэ нь Ираны түүхэнд эмэгтэй хүнд бэлгийн чиг хандлагаас нь болж цаазаар авах ял оноосон анхны тохиолдол гэж хүний эрхийн төлөө тэмцэгчид мэдэгдэв.
31 настай Зара Седиги Хамедани, 24 настай Элхам Чубдар нарын шүүхийн шийдвэрийг Курдын хүний эрхийн Хенгау байгууллага мэдээлж, олон улсын хамтын нийгэмлэгийг Иранд шахалт үзүүлж, ялыг хүчингүй болгохыг уриалж байна.
Хүний эрхийн төлөө тэмцэгчдийн мэдээлснээр Умрия шоронд хоригдож буй эмэгтэйчүүдэд ялыг мэдэгдсэн бөгөөд Ираны шүүхийн эрх баригчид албан ёсны мэдэгдэл хийж, ялыг баталсан байна.
Хүний эрхийн төлөө тэмцэгчдийн мэдээлснээр эмэгтэйчүүдийг мөн Христийн шашныг дэлгэрүүлж, сөрөг хүчний хэвлэл мэдээллийн хэрэгслүүдтэй холбоотой байсан гэж буруутгаж байна.
Хоёр идэвхтэнтэй ижил хэрэгт тус хотын оршин суугч 52 настай Сохелия Ашрафи хэмээх өөр эмэгтэйг саатуулсан байна. Тэр одоохондоо ял аваагүй байна.
Ираны ЛГБТ идэвхтэн 31 настай Зара Седиги Хамедан өнгөрсөн оны аравдугаар сард Иранаас Турк руу гарах гэж байгаад саатуулагдсан юм. Үүнээс өмнө тэрээр өөрийн амьдарч байсан Иракийн Курдистанаас эх орондоо иржээ. Баривчлагдсаныхаа дараа түүнийг хоёр сар орчим ганцаарчлан хорьсон.
Хүний эрхийн төлөө тэмцэгчдийн мэдээлснээр Хамеданийг баривчлагдсаныхаа дараа өмгөөлөгчтэй уулзуулаагүй, дарамталж, хоёр хүүхдээ асран хамгаалах эрхийг хасна гэж заналхийлсэн байна.
Хүний эрхийн байгууллагууд сүүлийн үед Иранд цаазаар авах ялын хэмжээ нэмэгдэж, зөвхөн долдугаар сарын сүүлийн долоо хоногт л гэхэд 32 хүнд цаазаар авах ял оноосны дотор гурван эмэгтэй байгаа гэж мэдэгджээ.
Эх сурвалж: ВВС
