Өнөөдөр хичээлийн шинэ жил тохиож байгаатай холбогдуулан Ерөнхий сайд Л.Оюун-Эрдэнэ, БШУ-ны сайд Л.Энх-Амгалан, Нийслэлийн Засаг Дарга Д.Сумъяабазар нар сургууль, цэцэрлэгийн үйл ажиллагаатай танилцлаа. Энэ үеэр сургууль цэцэрлэгийн үйл ажиллагаа болон цэцэрлэгт хамрагдаж чадаагүй 9000 хүүхдийн талаар мэдээлэл өглөө.
Л.Энх-Амгалан: “Бид сугалааны цэцэрлэгийн тогтолцоог халахыг зорьж ирсэн. Манай улс 20 жилийн турш сугалааны цэцэрлэгийн тогтолцоотой явсан. Нэг жилд өргөс авсан юм шиг арилгана гэдэг бол хэцүү. Бид ямар ч байсан Улаанбаатар хотод байгаа 34 мянган хүүхдийг цэцэрлэгээр хангах хувилбаруудыг санал болгосон. Цэцэрлэгт хамрагдаж чадаагүй 9 мянган хүүхдийн тухайд бүгд хамрагдана. Харин есдүгээр сарын 01-нд биш есдүгээр сарын 15-нд , аравдугаар сарын 01-нд гэсэн үе шатуудтайгаар хамруулна.
Тендерийн хуулиар цэцэрлэгийн зориулалтаар барилга худалдаж авахад цаг хугацаа алдаж байна. Нэг давхар орон сууцнуудын, байруудыг бас тендерийн хуулиар бид худалдаж авах ёстой. Хамгийн наад зах нь гэхэд тендер зарлаад, худалдаж авахад 45 хоног алдаж байна. Тиймээс ойрын хугацаанд энэ асуудлыг шийдэж үе шаттайгаар хүүхдүүддээ бүрэн хамруулах боломж байна. Нэг зүйлийг баттай хэлье. Одоо арваннэгдүгээр сарын 01 гэхэд нэг ч хүүхэд цэцэрлэгийн гадна үлдэхгүй.
Хүмүүсийн бүртгэлээс шалтгаалаад нэг айлын 3 хүүхэд 3 өөр газар хуваарилагдсан гэх мэт олон асуудал гарч байна. Цахим элсэлтээр бүртгэл хийхэд Улаанбаатар хотын хэмжээнд 110 мянган хүүхдийг бүртгэчихсэн. Тэгсэн мөртлөө бид нар 140 мянган хүүхдийн цэцэрлэг бэлдчихсэн байна.
Гол асуудал бол ХУД болон БЗД дэх цэцэрлэггүй баригдсан хорооллууд дээр л асуудлууд байгаа юм. Жишээ нь: БЗД-ын 25-р хороонд байгаа төрийн ганцхан цэцэрлэг дээр бид элсэлт авдаг байсан. Гэтэл цэцэрлэгийн насны 1600 хүүхэд байхад 600 хүүхдийн хүчин чадалтай цэцэрлэг байлаа гэж бодоход цаана нь 1000 хүүхэд цэцэрлэггүй үлдэж байна. Тийм учраас хувийн цэцэрлэгүүдтэйгээ гэрээ байгуулсан. Хэрэв танай цэцэрлэгт багтаамж байвал та нар хүүхэд нэмж ав, төр нэг хүүхдийн хувьсах зардлыг 2 дахин үржүүлээд өгье гэсэн шийдэл гаргасан. Ингэснээр 12 мянган хүүхдийн асуудлын хувийн цэцэрлэгүүд шийдэж чадаж байна. Ахиад нэмэлтээр хувийн хэвшлийн цэцэрлэгүүд болон нэг давхарын орон сууцнуудыг бид ашиглаж чадвал маш богино хугацаанд цэцэрлэгийнхээ хүртээмжийн асуудлыг шийдэж чадна” гэлээ.
Г.Бүжинлхам
