БНСУ-ын гадаад хэргийн сайдын айлчлал өнгөрсөн 30 жилийн харилцааг дүгнэх, ирэх 30 жилийн хамтын ажиллагааны хэтийн төлөвийг тодорхойлоход онцгой ач холбогдолтой юм. Айлчлалын хүрээнд хийсэн хэлэлцээрээр хамтын ажиллагааг таван тулгуур чиглэлд өргөжүүлэн бэхжүүлэх талаар санал солилцлоо.
Монгол Улс, БНСУ нь ардчилал, хүний эрх, эрх чөлөө , зах зээлийн эдийн засгийн харилцааны нийтлэг асуудлууд, хоёр улсын хоорондох улс төрийн яриа хэлэлцээрийг эрчимжүүлж, гадаад бодлого, аюулгүй байдал, батлан хамгаалах асуудлаар стратекийн яриа хэлэлцээрийг бэхжүүлэх талаар санал нэгдлээ. Энэ хүрээнд Монгол, Солонгосын Засгийн Газар хоорондын хамтарсан яриа хэлэлцээрийн механизмүүдийг бэхжүүлж энэ ондоо багтаж зохион байгуулахаар тохирсон байна. Мөн Монгол Улсын алсын хараа 2050 хөтөлбөрийг хамтран хэрэгжүүлэх талаар санал солилцлоо.
Гадаад харилцааны сайд Б.Батцэцэг: БНСУ-тай хамтран шинэ нисэх онгоц буюу Хөшигийн хөндийд чөлөөт бүс байгуулах ажлыг хамтран зохион байгуулахаар боллоо. Мөн тэрбум мод төслийн хүрээнд 45 га талбайд мод тарихаар боллоо. Монгол Солонгосын иргэдийг солилцох ажлын хүрээнд хамтран анжиллана. Тус улсад амьдарч буй манай улсын иргэдийн амьдралд дэмжлэг үзүүлэхээ дэмжсэн. Цаашдын хамтын ажиллагаа улам үр өгөөжтэй байна гэдэгт итгэл төгс байна" гэв. Мөн хөрөнгө оруулалтыг дэмжих, харилцан хамгаалах тухай Засгийн газар хоорондын хэлэлцээрийг шинэчлэх эрчимжүүлэхээр тохирлоо гэсэн юм.
БНСУ-ын Гадаад хэргийн сайд Пак Жин: Монгол Солонгосын хоорондын стратегийн харилцааг гүнзгийрүүлнэ. Үүний тулд, төрийн түшээд болон ЗГ-ын харилцааг харилцан идэвхжүүлэхээр боллоо. Юуны өмнө энэ онд багтаан хоёр орны стратегийн түвшний уулзалтын анхдугаар уулзалтыг зохион байгуулна.
Хоёр орон бүс нутгийн төлөө хамтран алхах болно. Солонгосын зүгээс Монгол Улсыг Зүүн Азийн уулзалтад оролцоход дэмжиж ажиллана. Монгол иргэдийн БНСУ-д зорчих визийн нөхцөлийг хөнгөвчлөх, хоёр орны нислэгийг нэмэгдүүлэх талаар ярилцлаа" гэлээ.
БНСУ-ын гадаад хэргийн сайд Пак Жин наймдугаар сарын 28-30-ны өдрүүдэд манай улсад албан ёсны айлчлал хийж байна. Энэхүү айлчлал нь БНСУ-ын Гадаад хэргийн сайдын түвшинд 2014 оноос хойш буюу 8 жилийн дараа Монгол Улсад хэрэгжиж буй айлчлал бөгөөд манай улсын “гуравдагч хөрш”, худалдаа, хөрөнгө оруулалтын чухал түнш БНСУ-тай хөгжүүлж буй харилцаа, хамтын ажиллагааг өргөжүүлэн хөгжүүлэхэд чухал ач холбогдолтой юм.
Г. Бүжинлхам
