Ерөнхий сайд Л.Оюун-Эрдэнэ Засгийн газрын бүтэцдээ өөрчлөлт оруулах хуулийн төслөө байнгын хороо, УИХ-аар хэлэлцүүлж батлуулна. Дараагаар нь шинэ сайдуудаа томилж, захирамж гарган УИХ-д оруулж тангараг өргүүлэх магадлалтай. Энэхүү процесс өнөөдөртөө багтахгүй байх магадлалтай тул маргааш буюу мягмар гарагт шинэ Засгийн газрын гишүүд тодрох бололтой.
Шинээр батлагдах Засгийн газар 20 сайдтай болох мэдээлэл гараад байна. Батлан хамгаалахын сайд Г.Сайханбаяр, Гадаад харилцааны сайд Б.Батцэцэг, Шадар сайд С.Амарсайхан, Хөдөлмөр, нийгмийн хамгааллын сайд А.Ариунзаяа, Соёлын сайд Ч.Номин, Хууль зүй, дотоод хэргийн сайд Х.Нямбаатар, Сангийн сайд Б.Жавхлан мөн Боловсрол, шинжлэх ухааны сайд Л.Энх-Амгалан нарыг танхимдаа үлдээхээр тохирсон гэх мэдээлэл байна.
Засгийн газрын Хэрэг эрхлэх газрын даргаар Д.Тогтохсүрэн, УИХ-ын гишүүн Ж.Мөнхбат тэргүүн Шадар сайдад, Цахим хөгжлийн сайдаар Н.Учрал, Уул уурхай, хүнд үйлдвэрийн сайдад Б.Чойжилсүрэн, Эдийн засгийн хөгжлийн сайдад Ч.Хүрэлбаатар, Хүнс, хөдөө аж ахуй хөнгөн үйлдвэрийн сайдад Х.Болорчулуун, Эрчим хүчний сайдад Б.Баттөмөр, Зам, тээврийн хөгжлийн сайдаар Ж.Ганбаатар, Байгаль орчин, аялал жуулчлалын сайдаар Б.Саранчимэг нар ажиллах бололтой.
