ТББХ-ны өнөөдрийн хуралдаанаар Улсын Их Хурлаас Засгын Газарт чиглэл өгөх тогтоолын төслийг боловсруулах ажлын хэсгийг гаргах талаарх асуудлаар санал солилцлоо. Тус ажлын хэсэг нь ҮХЦ-ийн гаргасан шийдвэртэй холбоотой гарсан хуулийн өөрчлөлтийн хүрээнд өмнө нь хийсэн хэлэлцүүлгүүдийг нэгтгэн УИХ-аас ЗГ-т чиглэсэн тогтоол гаргах зорилготой юм.
Энэ тогтоолын төслийн ажлын хэсгийг Т.Доржханд, Ж.Мөнхбат, Ж.Сүхбаатар, Н.Энхболд , С.Одонтуяа гэсэн гишүүдийн бүрэлдэхүүнтэй байгуулахаар боллоо. Харин ажлын хэсгийн ахлахаар УИХ-ын гишүүн С.Одонтуяа томилно гэв.
Энэ үеэр УИХ-ын гишүүн Энхболд өөрийн саналаар ажлын хэсэгт орохоос татгалзлаа. Тэрээр "Энэ удаад би ажлын хэсэгт орохгүй. Залуу гишүүдээс ажлын хэсэгт оруулах хэрэгтэй" гэлээ. Түүний оронд УИХ-ын гишүүн Ш.Раднаасэдийг оруулахаар тогтлоо. Тогтоолын төслийг наймдугаар сарын 29-ний өдрийн дотор боловсруулан Төрийн байгуулалтын байнгын хороонд танилцуулахыг үүрэг болгов.
ТББХ-ны гишүүд уг тогтоолын төслийг дэмжсэнээр өнөөдрийн хэлэлцэх асуудал үүгээр өндөрлөлөө.
Г.Бүжинлхам
