Үндсэн хуулийн Цэц 2022 оны наймдугаар сарын 15-ны хуралдааны 02 дугаар тогтоолоороо Үндсэн хуулийн “Ерөнхий сайд болон Засгийн газрын дөрөв хүртэлх гишүүн УИХ-ын гишүүний албан тушаалыг хавсарч болно” гэсэн заалтыг хүчингүй болгосноор Л.Оюун-Эрдэнийн Засгийн газрын бүтэц, бүрэлдэхүүн хэрхэн өөрчлөгдөх асуудал анхаарал татаж байна.
Давхар дээлтэй буюу УИХ-ын гишүүнээр ажилладаг сайд нар болох Шадар сайд С.Амарсайхан, Боловсрол, шинжлэх ухаан, спортын сайд Л.Энх-Амгалан, Сангийн сайд Б.Жавхлан, Хууль зүй, дотоод хэргийн сайд Х.Нямбаатар нарыг Засгийн газарт хэвээр ажиллуулна.
Харин дан дээлтнүүдийн асуудал хараахан эцэслэгдээгүй байна. Эх сурвалжийн мэдээлснээр Ц.Нямдоржийг ЗГХЭГ-ын дарга, Монгол Улсын сайдаас чөлөөлөхөөр ярьж байна. Гадаад харилцааны сайд Б.Батцэцэг, Соёлын сайд Ч.Номин нарыг үлдээхээр ярьжээ.
Үндсэн хууль болон Засгийн газрын тухай хуульд зааснаар Монгол Улсын Ерөнхий сайд Засгийн газрынхаа бүрэлдэхүүнд хэнийг ажиллуулахаа өөрөө мэдэж, хариуцлагыг нь УИХ-ын өмнө үүрдэг. Энэ дагуу дээхнэ Засгийн газрын хурал дээрээ сайд нарынхаа ажлыг өөрөө үнэлж, дүгнэхээ мэдэгдсэн бөгөөд ажил нь явахгүй байгаа сайд нарыг цохож нэрлэжээ. Энэ үеэрээ “Сайдын ажил гэдэг бол улс төрийн албан тушаал. Удирдаж байгаа салбарт чинь урагшлахгүй байгаа болон олны шүүмжлэл дагуулсан алдаа гарч байгаа. Улс төрийн албан тушаал учраас улстөрөө даагаарай” гэж хэлсэн тухай мэдээлэл байгаа юм.
Одоогийн байдлаар Засгийн газар Тэргүүн шадар сайдын орон тоо гаргаж ажиллуулахаар ярьж байна. Энэ албан тушаалыг УИХ-ын гишүүдээс Төрийн байгуулалтын байнгын хорооны дарга Ж.Мөнхбатыг амлан авчээ.
Г.Улсболд
Эх сурвалж: Time.mn
