Хууль зүй, дотоод хэргийн Төрийн нарийн бичгийн дарга П.Сайнзориг Үндэсний баяр наадамд дөрвөөс дээш давсан бөхчүүд болон сурын харваачдаас авсан допингийн шинжилгээний хариу ирсэн талаар мэдээлэл өглөө.
-Допингийн шинжилгээг хэчнээн бөхөөс авсан бэ. Шинжилгээний хариу бүрэн ирсэн үү?
-Энэ жил Баяр наадмын тухай шинэчилсэн найруулгыг баталж, үндэсний бөх болон сурын харваанд оролцож байгаа тамирчдаас допингийн шинжилгээ авсан. Өөрөөр хэлбэл, өмнө нь тав болон түүнээс дээш давсан бөхчүүдээс допингийн шинжилгээ авч байсан бол энэ жилээс дөрөв болон түүнээс дээш давсан бөх, сурын шөвгөрсөн сурчип буюу нийт 80 хүнээс допингийн шинжилгээ авсан. Нийт 80 хүний 16 нь харваач, 64 нь бөхчүүд байна. Допингийн шинжилгээг цагдаа болон тагнуулын байгууллагын хяналт оролцоотойгоор допингийн эсрэг үндэсний хорооны ажилчид авсан. Үүнийг хамгаалалтайгаар Солонгос улсын итгэмжлэгдсэн лабораторид илгээсэн. Эхнээсээ хариу нь ирж байгаа ч 80 хүний хариу бүрэн ирээгүй байгаа тул зохих журмаар нээж, хариутай танилцаагүй байна.
Гадуур тодорхой бөхчүүд допинг хэрэглэсэн байж магадгүй, байна гэсэн ташаа мэдээллүүд явж байна.Одоогоор хэн нэгэн этгээд допинг хэрэглэсэн, хэрэглээгүй гэдэг асуудал дээр хариулт хэлэх болоогүй.
Одоогоор 80 хүний 77-гийнх нь хариу ирсэн байна. Хариу нь бүрэн ирэхээр зохих журмын дагуу олон нийтэд мэдээлэх болно. Тэгэхээр миний зүгээс ийм тийм гэх тайлбар хэлэх боломжгүй Допингийн эсрэг үндэсний төвд хариу ирэхээр хамтран мэдээлнэ.
-Допингийн шинжилгээний хариу допингийн эсрэг байгууллагаар дамжин ирж байгаа. Хариуг дунд нь задруулахгүй байж чадаж байгаа юу?
-Олон улсын итгэмжлэгдсэн лабораториос ирж байгаа материалыг солих наана, цаана болгох боломжгүй. Дараа нь допинг хэрэглэсэн бөхчүүдийн мэдээлэл натогийн лабораторид орчихдог. Ямар нэг байдлаар хэрэглэсэн хүнийг хэрэглээгүй болгох ч гэдэг юм уу тийм зүйл байхгүй. Буруу зөрүү мэдээлэл тарааж иргэдийг төөрөгдүүлж болзошгүй.
-Допинг илэрсэн эсэх мэдээллийг тухайн лабораториос Вато руу явуулдаг юм уу. Яагаад ингэж удаж байна вэ. Солонгосын лабораториос өөр лабораторид хийлгэх боломжгүй юу?
-Засгийн газар болон холбогдох тэмцээн уралдаан зохион байгуулагчид маань Допингийн эсрэг үндэсний төвтэй гэрээ байгуулаад төлбөрийг нь төлөөд олон улсын итгэмжлэгдсэн лабораторид илгээдэг. Нэр бүхий гишүүдээс үндэсний биеийн тамирын спортын тухай хуульд өөрчлөлт оруулж, допингийн эсрэг тодорхой өөрчлөлтүүдийг хийж байна. Цаашдаа Тэмцээн уралдаанаа эх орондоо зохион байгуулдаг тул допингийн шинжилгээг түргэн шуурхай гаргадаг байх үүднээс өөрсдийн лабораторитой болох асуудал яригдаж байна. Нөхцөл байдал сайжраад өөрсдөө лабораторитой болбол богино хугацаанд шинжилгээ хийх боломж бүрдэх байх. Гэхдээ өнөөгийн нөхцөл байдал ийм байна.
-Хэвлэлээр зарим бөхчүүдээс допинг илэрсэн тухай мэдээлэл гарч байгаа. Эхнээсээ ирсэн шинжилгээний хариутай танилцсан гэсэн үг үү?
-Мэдээлэлтэй хэн ч танилцаагүй байна. Хэрэглэсэн хэрэглээгүй гэх зүйлийг хэлэх ямар ч боломжгүй. Хий хоосон талцах, хуваагдах байдалд битгий оруулаасай гэж хүсэж байна.Бидэнд нуугаад байх зүйл алга. 80 хүний хариу ирэхээр зохих журмын дагуу мэдээллээ өгнө. Яагаад 3 хүнийх удаад байгааг би хэлэх боломжгүй. Олон улсын итгэмжлэгдсэн Солонгосын лабораторийн хариуг хүлээхээс аргагүй. Тодорхой хэмжээгээр бүх хариу маань эцэслэгдэх тал руугаа явж байна.
-Допингийн шинжилгээний төсөв гэж хэдэн төгрөгийн төсөв төсөвлөдөг вэ?
-Баяр наадмын төсөвт суудаггүй. Тухайн жил жилдээ допингийн эсрэг үндэсний төв, бөхийн холбоо өөрсдөө төлбөрөө төлөөд шинжилгээ хийлгэж байгаа. Мөн спорт, баяр наадмыг зохион байгуулж байгаа зохион байгуулагч тал зардлаа хариуцаад явдаг. Манайх гэрээтэй. Гэрээний хүрээнд шийдээд явдаг. Түүнээс миний зүгээс төсвийн талаар мэдээлэл өгөх боломжгүй.
Олон нийтэд мэдээлэхээс өмнө магадгүй допинг илэрсэн бол тухайн тамирчинд мэдэгдээд дараагийн шинжилгээ өгөх эсэхийг тодруулдаг.Тэгээд хоёр дахь шинжилгээний талаар холбогдох газруудтай хамтраад нийтэд мэдээлдэг.
