Цар тахлын үед олны уур бухимдлыг төрүүлэн байж боссон Чингис хааны музейн бүтээн байгуулалтад 62.8 тэрбум төгрөг зарцуулсан тухай үгсийг Соёлын сайд Ч.Номин нэгэнтээ уруул давуулан унагасан удаатай.
Уг музейг баяр наадмын өмнө буюу 7 дугаар сарын 03-нд ашиглалтад оруулна гэж олныг хошгируулж байв.
Гэтэл хил гааль хаалттай “Шанхайд шилэн хорго гацсан” тул музейн нээлт хойшиллоо” гээд өнгөрсөн.
Олон улсын стандартад нийцсэн шилэн хоргыг БНСУ-аас худалдан авч байгаа бөгөөд тээвэрлэх явцад Шанхайн боомт дээр саатсан гэснээс хойш бараг л хоёр сар гаруй хугацаа өнгөрсөн ч мөн л таг чиг.
Хэдийгээр шилэн хоргоноос болж хугацаандаа нээлтээ хийж чадаагүй ч улсын хэмжээнд үйл ажиллагаа явуулдаг 34 музей болон эрдэм шинжилгээний хүрээлэн дэх үзмэрүүдээс татан авалт хийж нийт үзмэрийн 60-70 хувийг бүрдүүлж байгааг тухайн үед мэдээлж байсан.
Гэтэл тус музейг үзэхээр ирсэн жуулчид ямар олон байсныг аялал жуулчлалын байгууллагуудын хөтөч нар халаглан ярьж байв. Хамтын ажиллагаатай, заримтай нь бөөрөө нийлүүлэн зэрэгцэн оршдог хэрнээ хэдхэн шилэн хорго татаад авчихаж чадахгүй байгааг нь ДОРОЙ, арчаагүй гэхээс өөр юу гэлтэй.
Бас “ядаж байхад яр” гэгчээр байшингийн дээвэр орчимд хийсэн 5 ширхэг ТАМГА нь хүмүүсийн ой тойнд ер буухгүй, байгаа болохоор ард олны зүгээс “Ямар хуу юм болчхоод ингэж удаад байгаа юм бол” гэсэн сониуч зан хөдөлж яарах нь ч тодорхой.
Тэгээд ч Ч.Номин сайд аа,
- Монголын эрт, дундад үеийн төрт улсын хаад язгууртны дээл хувцсыг хаанаас 118 сая төгрөгөөр,
- Монголын эрт, дундад үеийн хот, сүм хийдийн сэргээсэн загварууд хэнээс 325 саяар,
- Монголын эртний нүүдэлчдийн хаад, язгууртны хөгжмийн зэмсгүүдийг мөн хэнээс, хаанаас 70 саяар,
- Монголын уламжлалт мод, модон эдлэлийн бүтээлүүд хаанаас, хэнээс 63 саяар,
- Чингис хааныг ширээнд залах ёслол, монументал уран зурагийг хэнээс, хаанаас 100 саяар Үзмэр, үзлэгийн танхимын тоноглол, хадгалалт хамгаалалт, сэргээн засварлалтын дагалдах хэрэгслүүдийг хаанаас 2 тэрбум төгрөгөөр,
- Үзмэр сэргээн засварлах үед шаардлагатай нэмэлт материал, багаж хэрэгслийг мөн хаанаас 80 саяар,
- Шанхайд гацаад байгаа шилэн хорго, витрин тоног төхөөрөмжийн гэрээг хэнтэй 5 тэрбум төгрөгөөр байгуулсанаа,
- Үл хөдлөх хөшөө, дурсгалын хуулбаруудыг хэнээс 154 сая төгрөгөөр,
- Монголын уламжлалт зургуудыг хэнээс, хаанаас 328 сая төгрөгөөр,
- Хаадын лаан баримлыг хэнээс 564 сая төгрөгөөр тус тус худалдаж авснаа сайхан тайлбарлачихсан нь ч дээр биз.
Яагаад гэвэл ард иргэд аль хэдийн хяналт тавиад эхэлчхэж.
Эх сурвалж: С.Цээл, Erennews.mn
