Цар тахлын тархалт нэмэгдэж буй тул Эрүүл мэндийн яамнаас цаг үеийн асуудлаар мэдээлэл хийлээ.
Эрүүл мэндийн сайдын зөвлөх О.Батбаяр ""Дэлхий дахинд омикроны ВА4, ВА5 хувилбараас үүдэлтэй халдварын тоо эрчимтэй нэмэгдэж Зүүн өмнөд Азийн орнуудад халдварын тархалт 37 хувиар өслөө. Япон, БНСУ-д халдварын тохиолдол 2-3 дахин нэмэгдсэн. ВА4, ВА5 хувилбарууд халдварлах чадвар илүү өндөр юм. ХӨСҮТ-ийн генийн дараалал тогтоох лабораторийн шинжилгээний дүнгээс харахад BA4, BA5 хувилбарын эзлэх хувь манай улсад халдварын 10 орчим хувьд байгаа. Цаашид 80-90 хувьд хүрэх магадлалтай байна. ВА4, ВА5 нь омикроны сүүлийн хувилбар биш. Дахин өөр хувилбар гарах боломжтой гэдгийг эрдэмтэд анхааруулж байгаа. Шинж тэмдгийн хувьд нус гоожих, хоолой өвдөх, тасралтгүй ханиалгах, үеэр өвдөх, халуурах, цустай ханиах зэрэг шинж тэмдгүүд илэрч байгаа" гэв.
