Өчигдөр буюу (2022.07.20)-нд МҮЭ-ийн холбооноос түлшний үнэ нэмэгдсэнтэй холбогдуулан өргөн хэрэглээний бараа бүтээгдэхүүний үнэд хэрхэн өөрчлөлт орсныг судаллаа.
МҮЭ-ийн холбооны Ерөнхийлөгч С.Эрдэнэбат "Ковид19 цар тахлын улмаас өнгөрөгч жилүүдэд иргэд, хөдөлмөрчдийн цалин нэмэгдээгүй. Гэвч түлш, шатахууны үнэ нэмэгдэж үүнийг дагасан өргөн хэрэглээний бараа бүтээгдэхүүний үнэ ахин дахин өсөж байгаа нь ард иргэдийн бодит худалдан авах чадвар буурч амьжиргаагаа залгуулах боломжгүй байдалд хүргэж байна. Иймд МҮЭ-ийн холбооноос өргөн хэрэглээний бараа бүтээгдэхүүний үнийн судалгааг хийж холбогдох арга хэмжээг авч ажиллахыг УИХ, Засгийн газраас шаардаж ажиллана" гэдгийг онцолж байсан юм.
Тэрээр өнөөдөр Барс худалдааны төв болон Гурвалжин, 44 дүгээр барилгын зах дээр ажиллаж өргөн хэрэглээний бараа бүтээгдэхүүний үнэ болон цементийн үнийн судалгаа хийв.Цементийн үнийн тухайд нэг шуудай Мон цемент 18.500 төгрөг, Мак цемент 20.000 төгрөг, Хөтөлийн цемент 15.000 төгрөг байгаа боловч яг одоо тус захад Хөтөлийн цемент худалдагдаад дууссан байна. Энэ талаар худалдаачдаас тодруулахад, "Нөөц хангалттай байгаа учир маргааш дахиад ирнэ үнэ огт нэмэгдэхгүй" гэсэн хариуг өгөв. Мөн "Өнгөрсөн сард нэг шуудай нь 25.000 төгрөгт хүрээд байсан цементийн үнэ дунджаар 19.000 төгрөг болтлоо буурч байгаа шалтгаан нь "Хөтөлийн цемент"-ийн үнэ зах зээлийн ханшнаас даруй хямд төдийгүй нэг шуудай нь 15.000 төгрөгөөр худалдаанд гарч байгаа нь цементийн хөөрөгдсөн үнийг тогтоон барихад нөлөөлж байгаа" гэдгийг худалдаачид онцолж байсан юм.
Барс худалдааны төвд ажиллах үеэр хүнсний ногооны худалдаачдын зүгээс хаврын улирлаас намрын ургац хураалтын үе хүртэлх хугацаанд импортын ногооны үнэд өндөр татвар ногдуулж байгаа нь өргөн хэрэглээний төмс, хүнсний ногоог хомстолд оруулж үнийн хөөрөгдлийг даамжруулж улмаар нэг кг төмс 5000 төгрөгт хүрээд байгааг хэлж байв. Хахин гурилны үнэ 10-20 төгрөгөөр нэмэгдсэн бол махны үнэ буурч, будаа тос өнгөрсөн оны мөн үетэй харьцуулахад хоёр дахин өссөн байна.
