Үндэсний их баяр наадмын бөхийн барилдаанд Ховд аймгийн Буянт сумын харьяат улсын харцага О.Хангай 10 даван түрүүлж улсын аварга цол хүртсэн билээ. Тэрбээр аварга болсон сэтгэгдлээ илэрхийлж, Монгол түмэндээ баяр наадмын мэнд дэвшүүлсэн юм.
Улсын аварга О.Хангай "Үгээр хэлэхийн аргагүй сайхан байна. Ардын хувьсгалынхаа 100, 101 жилийн ойд түрүүлээд зогсож байгаадаа баяртай байна. Энэ бол миний мөрөөдөл байсан. Төрүүлж, өсгөсөн аав, ээж, үргэлж зааж сургадаг багш нартаа баярлалаа. Нутгийнхаа ард түмэнд, аавынхаа нутаг Говь-Алтай аймгийн Жаргалант сумынхандаа, Монголынхоо нийт ард түмэнд баяр наадмын мэнд дэвшүүлье" гэлээ.
