УИХ-ын гишүүн Н.Учрал нарын 12 гишүүний 2022 оны долдугаар сарын 1-ний өдөр өргөн мэдүүлсэн Монгол Улсын Их Хурлын тухай хуульд нэмэлт өөрчлөлт оруулах тухай болон хамт өргөн мэдүүлсэн хуулийн төслүүдийн хэлэлцэх эсэхийг чуулганы хуралдаанаар хэлэлцэж байна.
Улмаар анхны болон эцсийн хэлэлцүүлгийг өнөөдрийн дотор хийхээр төлөвлөсөн байна.
Хаврын чуулган өндөрлөхөөс өмнө яаран сандран ийнхүү хэлэлцэн батлах гэж буй хуулийн төслийг танилцуулж байна.
Уг хуулийн төслийн танилцуулгад дурдсанаар "Хууль тогтоогчоос батлан гаргаж буй хууль, тогтоомжийн чанарын тухайд хамгийн чухлаар тавигддаг асуудал бол уг хууль нь нийгмийн шаардлагыг хангаж чадаж байгаа эсэх бөгөөд хууль тогтоох үйл явц дахь иргэдийн идэвхтэй оролцоо нь нэг талаас төрийн үйл ажиллагааны ил тод байдлын илэрхийлэл, нөгөө талаас иргэдийн улс төрийн идэвхийг хөхүүлэн дэмжих нэг гол хөшүүрэг болдог. Тиймээс хэлэлцэж буй хууль тогтоомжийн төсөлд олон нийтийн саналыг аль болох өргөн тусгаснаар уг хуулийн төсөл нийтийн эрх ашигт илүү ойр дөт болж, ингэснээр амьдрал, практикт хэрэгжих үндэслэл сайтай байх нь ойлгомжтой.
Монголын төр засаг үйл ажиллагаандаа ардчилсан засаглалын үйл ажиллагааны үндсэн зарчим болсон ил тод, нээлттэй байдлыг хэрэгжүүлэх, энэ үндсэн дээр төрийн бодлого боловсруулах, хэлэлцэх, улмаар шийдвэр гаргах түвшинд иргэд, олон нийтийн оролцоог хангаж ажиллахад бодитой, тодорхой ач холбогдол өгөх шаардлагатай байна. Иймээс Монгол Улсын 18 нас хүрсэн иргэн тодорхой асуудлыг шийдвэрлүүлэх талаар саналаа Улсын Их Хурлын албан ёсны санал авах цахим хуудсаар дамжуулан гаргаж болох, Улсын Их Хурал иргэний төрийн байгууллага, албан тушаалтанд өргөдөл, гомдлоо гаргаж шийдвэрлүүлэх эрхийг хангаж, шийдвэр гаргахдаа иргэдийн оролцоог хангах зорилгоор албан ёсоор санал авахаар байршуулснаас хойш 30 хоногийн хугацаанд тодорхой асуудлаар ажлын хэсэг байгуулах саналыг 33,000 ба түүнээс дээш тооны иргэд дэмжсэн бол, Байнгын хорооны эрхлэх асуудлын хүрээнд хяналт шалгалт явуулах саналыг 70,000 ба түүнээс дээш тооны иргэд дэмжсэн бол Монгол Улсын Их Хурлын хяналт шалгалтын тухай хуулийн 9.3-т заасны дагуу, хуулийн төслийн талаарх саналыг 100,000 ба түүнээс дээш тооны иргэн дэмжсэн бол уг саналыг заавал хэлэлцэхээр тусгалаа. Түүнчлэн Ерөнхий сайдын мэдээллийн сэдвийн талаар цахим хуудсанд байршуулж, тав хоногийн хугацаанд тухайн сэдвийн хүрээнд иргэдийг асуулт асуух боломжоор хангана" хэмээжээ.
Хуулийн төсөл дэх онцлох заалтуудыг танилцуулж байна
- 391.1.Үндсэн хуулийн Гуравдугаар зүйлийн 1 дэх хэсэгт заасны дагуу Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдлэхдээ тодорхой асуудлыг шийдвэрлүүлэх талаар асуулт асуух, санал өгөх эрхээ Улсын Их Хурлын албан ёсны санал авах цахим хуудас /гар утас, хөдөлгөөнт төхөөрөмжид зориулсан Улсын Их Хурлын албан ёсны программ хангамж /-аар дамжуулан хэрэгжүүлж болно.
- 391.2.Улсын Их Хурал Үндсэн хуулийн Арван зургадугаар зүйлийн 12-т заасныг үндэслэн шийдвэр гаргахдаа иргэдийн оролцоог хангах зорилгоор энэ хуулийн 391.1-д заасан саналыг санал авах цахим хуудсанд 30 хоногийн хугацаатай байршуулах ба иргэдийн санал дараах тоонд хүрсэн тохиолдолд заавал хэлэлцэнэ:
- 391.2.1.тодорхой асуудлаар ажлын хэсэг байгуулах саналыг 33,000 ба түүнээс дээш тооны иргэн дэмжсэн бол;
- 391.2.2.Байнгын хорооны эрхлэх асуудлын хүрээнд хяналт шалгалт явуулах саналыг 70,000 ба түүнээс дээш тооны иргэн дэмжсэн бол Монгол Улсын Их Хурлын хяналт шалгалтын тухай хуулийн 9.3-т заасны дагуу;
- 391.2.3.хуулийн төслийн талаарх саналыг 100,000 ба түүнээс дээш тооны иргэн дэмжсэн бол.
