Өнөөдөр/2022.07.02/ Ардчилсан намын XIV их хурлын үеэр намын дарга С.Эрдэнэ зодуулжээ.
Тодруулбал, “Зэс эрдэнийн хувь”-ийн гэгдэх Д.Алтанхуяг С.Эрдэнийг тайзан дээр сууж байхад нь очиж, цохиж унагаж буй бичлэг олон нийтийн сүлжээгээр цацагдсан.
Аймгийн начин Д.Алтанхуяг уйлж бахираад "Эрдэнэт үйлдвэрийн овоолгоос өгөхгүй бол амиа хорлоно. 30 мянган иргэдээ жагсаан Эрдэнэт үйлдвэрийн хэвийн үйл ажиллагааг алдагдуулна" гэж сүрдүүлж байсан нь 10 жилийн өмнө билээ. 24500 иргэнээс 600 сая төгрөг босгож хуурамч хувьцаа гаргаж "Зэс Эрдэнийн хувь" ХХК байгуулж Эрдэнэтийн иргэдийг луйвардсан гэх Д.Алтанхуяг нь Улсын бүртгэл, Санхүүгийн зохицуулах хороонд бүтгэлгүй хууль бус компани байгуулан ард түмнийг залилаад Орхон аймгийн иргэдэд зодуулж хөөгдөн очих нүүргүй болсон билээ. Д.Алтанхуяг 2012 онд УИХ-д Иргэний зориг ногоон намаас нэр дэвшээд унажээ. 2016 онд Ардчилсан намаас нэр дэвшсэн ч ялагдсан. “Зэс эрдэнийн хувь” ХК-ны хувьцаа эзэмшигчдээс босгосон 600 сая төгрөгөөр сонгуульдчихсан гэх юм билээ. Ийм л увиагүй, эрээ цээргүй нөхөр өнөөдөр Ардчилсан намын эвлэн нэгдэх гэсэн хурлыг санаатайгаар үймүүлэн тараахыг завджээ.
Уг нь тус их хурал "Үнэт зүйл, үзэл баримтлал дээрээ нэгдье" уриан дор эв нэгдэл эрэлхийлсэн ч ийнхүү ширүүхэн үргэлжилж байна.
