УИХ-ын чуулганы нэгдсэн хуралдаан эхэллээ. Хуралдааны эхэнд 11 хуулийн төслийг эцэслэн батална. Мөн есөн хуулийн төсөл хэлэлцэж, үдээс хойш Ерөнхий сайдын мэдээллийг сонсоно.
Хэлэлцэх асуудалтай холбогдуулан УИХ-ын гишүүн Т.Аюурсайхан “Үндсэн хуулийг зөрчдөг болж байна. 2022 оны 06 дугаар сарын 27-ны өдөр ҮХЦ хуралдаж, өмнө гаргасан эцсийн шийдвэрээ эргэн харж, хүчингүй болгосон байна.
ҮХЦ-ийн 2016 оны 05 дугаар дүгнэлтээр хууль тогтоомжид байсан сонгуулийн хувь тэнцүүлэх сонгуулиар гэсэн заалт Үндсэн хууль зөрчиж байна гэсэн тогтоолыг баталсан. Үүнийг нь УИХ 2016 оны 38 дугаар тогтоолоор хүлээн авсан байна. ҮХЦ-ийн шийдвэрийг УИХ хүлээн зөвшөөрсөн бол тэр шийдвэр эцсийнх болно.
УИХ-ын гишүүн С.Бямбацогтыг итгэмжлэгдсэн төлөөлөгчөөр томилсон байна. Итгэмжлэгдсэн төлөөлөгч УИХ-ын шийдвэрийг хамгаалах ёстой. Гэтэл ҮХЦ дээр очоод УИХ-ынхаа шийдвэрийг хамгаалахгүй, яагаад эсрэг ажилладаг юм бэ.
Яагаад энэ бүхэн нууцаар явагддаг юм бэ? Бид яагаад шийдвэр гарсан хойно нь мэдэж байгаа юм бэ. Үндэсний баяр наадмаар иргэдийг 9 хоног амрааж, тараачихаад амралтын цагт яагаад энэ асуудлыг шийдэж байгаа юм бэ. Ийм цаг үед сонгогчийн эрхийг дордуулж, шууд халдсан шийдвэрийг хууль бусаар, хуйвалдааны зарчмаар гаргаж байгаагийн шалтгаан юу вэ?
Т.Доржханд гэдэг хүн төр бариад байгаа юм уу. Хэн төр бариад байгаа юм бэ. Маш ноцтой асуудал болоод байна.
Эх сурвалж: Shuud.mn
