БШУ-ны сайдын ЭЕШ-ын энэ цаг дор махан хоол хийн, ханийн дууг дуулан жаргаж байгаа юм болов, эсвэл тохуурхаж байгаа юм болов уу гэмээр хошин, хачин бичлэгийг харав. Гайхав!
Учир нь ийм юм.
Энэ цаг дор энэ улсын 1 сая гэр бүл, 40 мянган хүүхэд ЭЕШ-аар амьсгалж байна.
Өнжөөд л нэг шалгалт өгч,орой нь өгсөн ЭЕШ-даа хэдэн оноог авав даа гээд л гэр бүлээрээ, 40 мянгуулаа, улсаараа догдлон, зарим нь доглон нулимстай сууцгааж байна.
Зарим нь 12 жил сурчихаад ийм оноо авч ч байхдаа яахав дээ гэж хаа хаана эргэцүүлж, эгдүүцэн суух. Зарим нь өөртөө ч, бас өрөөлд ч, хамгийн гол нь 22 хичээлээр 12 жилийн турш талхиулж, долоо томьёог долоо жил үзэж, хоёр бичгээр холион бантан болгон хайран цагийн яйран үрэхэд хөтөлж байгаа увайгүй бодлогын золиос 12 жилийн турш болж явсандаа нялхаараа гоморхон сууна, цаана чинь.
ЭЕШ-ын дөнгүүр оноог хүүхэд зүгээр л явцаараа авч байх ёстой юм шүү дээ, уг нь сайд аа. Гэтэл тэгдэггүй болоод удаж байна.
Эрхэм дээд сайд Таны тогтоосон их дээд сургуульд элсэх босго болох 480-аас дээш оноог ЭЕШ-д бэлтгэх сургалтад албан сургуулийнхаа гадуур 2-3 жил тасралтгүй мөнгө төлж тусгайлан бэлтгэл хийж байж л авдаг болсон нь үнэн бодит байдал юм.
Тэгээд ЭЕШ-д бэлтгэх нь энэ улсад одоо уул уурхайнх шиг том бизнес болсон байна. ЭЕШ-ын томчууд төрж байна.
Хичээл, сургалт ч найдвар, тохирц алга.
ЭЕШ ч утга учир алга.
Боловсролын бодлогонд ч болж байгаа юм алга. За!
Дүнд нь 12 жил сургууль гэгчийн хашаанд хайрцган сэтгэлгээнд дөрлүүлэн хөлсөө урсгаж явсан хүүхэд энэ улсад дүнсгэрдүү байдалтай амьдралд хөл тавьж байна. Энэ гоё байна уу,танд?
Боловсролоо бодитой эрс шинэчил, ирээдүйнхээ төлөө ЭЕШ-ын тухай, боловсролын тухай эргэцүүл л дээ, хэлэлцүүл, ЭЕШ-ын энэ чухаг цаг дор ханийн дууг дуулангаа, хонин мах шарангаа хойч үеэрээ тохуурхан суухынхаа оронд, Сайд аа!
ЭЕШ-ын энэ чухаг цагт үеэ өнгөрөөсөн махан хоолыг сурталчилж, түүх болсон ханийн дууг дуулан суухдаа санаа тань ер нь огт зовохгүй байна гэж үү!
Эсвэл санаатайгаар тохуурхаад байгаа юм уу?
ЭЕШ мэт ийм том шалгалтын чухаг цаг дор уг нь эрүүл улсын боловсролын эрүүл сайд хүн бол хайрын дуу дуулж, хонины мах шарангаа жаргаж байгаагаа гайхуулах гээд байгаа юм болов уу, эсвэл тохуурхаж байгаа харуулах гээд байгаа болов уу гэж харсанд "Ямар сонин сайд вэ" гэж гайхан айхад, бас бөөлжихөд хүргэж явахгүй харин "Буруу бодлогын золиос болоод бөлтгөнөн, зүгээр л "би л буруутай юм даа" гэж догдлон доглон нулимстайгаар амьдралдаа хөл тавьж байгаа залуу үеийнхний тухай эргэцүүлж, ковидын үеийн 2 жилийн хорионы нөлөөг ЭЕШ-ын босгыг тогтоохдоо яагаад би тооцсонгүй вэ, тооцох нь яав даа" гэж халаглаж суумаар л юм шиг, уг нь.
Тийм үү, эсвэл үгүй юу?
Ц.Лувсандорж
2022 оны 6 дугаар сарын 26-ны өдөр