Нийслэлээс Хан-Уул дүүргийн 11 дүгээр хорооны нутаг Ар Зайсангийн гудамжинд байрлах "Энигма" компанийн Богдхан амралтын газрын 49 шавар гэрүүдийг буулгаж эхэлсэн билээ. Тэгвэл өчигдөр газар чөлөөлөх үеэр үүссэн зөрчлийн талаар мэдээлэл хийлээ.
Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ: -Өчигдөр Дархан цаазат Богдхан уулын ам руу орох гарах ганц замыг том оврын машинаар хаасан байсан. Богдхан ууланд долоо хоногт 5-6 мянган хүмүүс гардаг. Гарцыг нь хаасан тохиолдолд ууланд хүн бэртэх, ууланд гал түймэр гарвал яах уу.
Сүүлийн таван жилийн байдлаар цагдаагийн байгууллагад Богдхан амралтын газартай холбоотой 150 гомдол, мэдээлэл бүртгэгдсэн. Тэнд хүмүүс архиддаг, бага насны хүүхдүүд цугладаг. Тиймээс зөвшөөрөлгүй баригдсан гэрүүдийг нураасан.
"Энигма" гэх компани удаа дараа хууль зөрчиж байна. Ингэснээр онцгой нөхцөл байдал үүссэн үед цагдаа, эмнэлэг, онцгой байдлын алба очиж ажиллахаас өөр аргагүй болсон. Газрын тухай хуулийн дагуу албадан буулгах ажиллагаа явагдсан. Холбогдох бүх хуулийн дагуу явагдсан үйл ажиллагаа юм. МҮИС удаа дараа хууль зөрчиж байгаа. Баянгол дүүрэгт дөрвөн ч газарт архитектур төлөвлөлтийн даалгаваргүйгээр барилгын ажил эхлүүлсэн. Газрын зөрчил нь гэхэд 1 тэрбум төгрөг байна.
Хууль зөрчиж амташсан байна. Танил талаараа буюу улстөрчдөөр яриулж, дарамтлуулж асуудлыг шийддэг юм байна. Нийслэлийн газрыг зарж, баяжсан Т.Бадамжунай тэргүүтэй мафи бий. Газрын мафитай нийслэлийн удирдлагууд хатуу тэмцэнэ. Нийслэлчүүдийн эрх ашиг нэгдүгээрт. Дахиж тусгай хамгаалалттай газарт хууль зөрчин, хуулийн дээгүүр алхахыг нийслэл зөвшөөрөхгүй.
Өмнө нь ийм байсан, ингэж болдог байсан гэдэг нь өдгөө албан тушаал хашиж буй бидэнд хамаагүй. Мэдсэн хэр нь нүдэн балай, чихэн дүлий явдаг урьдын алдааг бид давтахгүй. Улаанбаатар хотын нийтийн эзэмшлийн зам, талбайг зориулалтын дагуу ашиглуулахын төлөө, тохижуулахын төлөө ажиллана. Хуучны аргаараа бидний үйл ажиллагаанд саад болох гэж байгаа бол тийм зүйл байхгүй. Бүх шатанд хууль зөрчиж ирсэн хүмүүстэй тэмцэнэ. Хууль бус үйлдэл гаргагчидтай үгсэн хуйвалдаж, эвлэрдэг, хамтарч ажилладаг, даалгаврыг нь биелүүлдэг дунд, доод шатны хүмүүс байвал хариуцлага тооцно." хэмээлээ.