Украины төрийн мэдээллийн агентлагууд Украины Ерөнхийлөгч Владимир Зеленский хориг арга хэмжээний зарлигт гарын үсэг зурсан тухай мэдээлэв. Уг зарлиг нь ОХУ-ын Ерөнхийлөгч Владимир Путин, ОХУ-ын Ерөнхийлөгчийн хэвлэлийн нарийн бичгийн дарга Д.Песков, ОХУ-ын Ерөнхий сайд М.Мишустин, ОХУ-ын Батлан хамгаалахын сайд С.Шойгу, ОХУ-ын Гадаад хэргийн сайд С.Лавров зэрэг 35 хүнд хориг арга хэмжээ авах тухай юм байна.
Хориг арга хэмжээнд Украины нутаг дэвсгэрт нэвтрэхийг хориглох, дээр дурдсан хүмүүсийн виз болон зөвшөөрлийг цуцлах, тэдний онгоц Украины агаарын орон зайд нисэхийг хориглох, олгосон бүх лиценз болон зөвшөөрлийг хүчингүй болгох, банк санхүүгийн хөрөнгийг царцаах зэрэг багтаж байна.