Улстөр, намын харьяаллаа үл харгалзан нутгархаж, нийлдэг нь Увсынхан. Товчхондоо тэд нэг нутаг усныхан учраас улстөр, бизнесийн талбарт хүчээ нэгтгэн, биесээ "өөд нь татаж" хамгаалсаар ирсэн. Харамсалтай нь, энэ эрх мэдлийн хүрээ хумигдаж магадгүй болоод байгаа аж.
Саяхан олон нийтийн анхаарлын төвд байсан Прокурорын тухай хуулийн өөрчлөлтийг одоогийн Засгийн газрын ХЭГ-ын дарга Ц.Нямдоржид зориулсан заалт гэгдэж, хуулийн төслийг санаачлагч нь эргүүлэн татаад байгаа.
Учир нь тухайн төсөлд, 45.4 дэх хэсгийн "прокурорын гэснийг "Монгол Улсын иргэнийг" гэж өөрчилсүгэй" гэсэн байв.
Энэ нь улстөрчдийг Ерөнхий прокуророор хэн дуртай хүнээ томилох боломжийг нээж өгөх байлаа.
Өмнө нь яг ингэж хуульд өөрчлөлт оруулснаар Д.Дорлигжав Ерөнхий прокурор болж байсан түүхтэй.
Харин энэ удаа Ц.Нямдоржийг Ерөнхий прокурор болгохоор зүтгүүлсэн хуулийн төсөлд Ерөнхийлөгч хүртэл дургүйцлээ илэрхийлснээр буцсан.
Ямартаа л УИХ-ын гишүүн Б.Энхбаяр "Ц.Нямдорж, Д.Дорлигжав хоёр гэж бие биенийхээ хэргийг дарж, хаацайлж, хуулиар түрээ барьж мафижсан жинхэнэ МАНАН бүлэглэл." гэж бухимдаж байх вэ дээ.
Тиймээс л Увсын фракцынхан ихэд бухимдаж, одоо нэгнийгээ хэрхэн "авч үлдэх вэ" хэмээн толгойгоо гашилгаж эхэлжээ.
Одоогоор Хөгжлийн банктай холбоотойгоор УИХ-ын гишүүн Н.Алтанхуягийг яллагдагчаар татаж, хилийн хориг хүртэл тавиад байгаа. Хэрвээ УИХ-ын Ёс зүй, сахилга хариуцлагын байнгын хорооноос түүнийг "үдчихвэл" хууль, шүүх, прокурорын байгууллагад ямар ч хамгаалалтгүй болчхоод байгаа юм.
Тиймээс Увсын фракцийнхан ууртай байгаа хэрэг.
Өмнө нь Б.Хурц 2017 онд Тагнуулын ерөнхий газрын дарга байхдаа "Ц.Нямдорж Хууль зүй, дотоод хэргийн сайдаар томилогдохоороо Тагнуулын ерөнхий газраар оролдож эхэлдэг. Энэ хүн өөрөө хууль зөрчдөг. Тэр нь одоо эхэлж байна.
Ц.Нямдорж ямар учиртай хүн бэ гэвэл Н.Алтанхуяг, Д.Дорлигжав гэсэн маршруттай бүлэглэл. Энэ бүлэглэл хүчтэй, хэвлэлтэй, телевизтэй, вэб сайттай бүлэглэл. Өөрсдөө " Эрдэнэт"-тэй холбоотой маш их шахаа, бизнес хийдэг.
"Эрдэнэт"-ийн захирлыг "Хаан жимс"-т дуудаж авчраад энэ гэрээг үргэлжлүүл гэж шахдаг.
Д.Дорлигжав "Эрдэнэт" үйлдвэрийн захирлаар ажиллаж байгаад 800 гаруй мянган ам.долларын асуудалд ороход Ц.Нямдорж хуулийн байгууллагад нөлөөлж, тэр хэрэг замхарсан." гэж байв.
Мөн 2019 онд Эрүүгийн хэргийг хянан шийдвэрлэх тухай хуулийн төслийг УИХ батлах үед Ц.Нямдорж ХЗДХ-ийн сайд байв. Тэр тус хуульд хөөн хэлэлцэх хугацаатай заалт оруулахаар ихэд зүтгэж, Х.Нямбаатар гишүүнийг "Чиний наад тодрох гэсэн өвчин аминд чинь хүрнэ шүү" гэж заналхийлж байсан. Товчхондоо Ц.Нямдорж хөөн хэлэлцэх хугацаатай холбоотой Ерөнхийлөгчийн саналыг 2-3 сар хав дарсан байдаг. Үүнийх нь цаана Ерөнхий сайд асан Н.Алтанхуягийн хүргэн Г.Дэнзэн, Улсын ерөнхий прокурор асан Д.Дорлигжав нарын Увсын франкцынхны холбогдсон хэргүүдийг хэрэгсэхгүй болгох ашиг сонирхол байсан гэдгийг тухайн үед хэвлэлүүд мэдээлж байсан билээ.
Харин одоо хамгаалалтгүй болчихсондоо бухимдаад Увсынхан ууртай байгаа нь Н.Алтанхуягийн холбогдсон хэрэг болон Б.Чойжилсүрэн нарын бизнесменүүдэд "алтан боломж, агуу их ашиг олдохгүй" болчих магадлалтай холбоотой.
Б.Төгөлдөр
Эх сурвалж: Erennews.mn