Ардчилсан намын бодлого, хөтөлбөрийг шинэ түвшинд гаргах зорилго бүхий Novex нэртэй клуб 2025 оны 11 сарын 04-ний өдөр байгуулагдаж өнөөдөр нэг жилийн ойгоо угтаж байна. Тус клубыг нэг жилийн өмнө Ардчилсан залуучуудын холбооны ерөнхийлөгч Э.Галбадралын манлайлал дор Монголын залуучуудын холбооны Удирдах зөвлөлийн гишүүд, Ардчилсан залуучуудын холбооны тэргүүлэгч залуус болон Ардчилсан намын анхан дунд шатны гишүүн залуус итгэл үнэмшлээрээ нэгдэн байгуулсан юм. Өдгөө Ардчилсан намын Үндэсний бодлогын хороо, Улс төрийн зөвлөлд төлөөлөлтэй болсон Новекс клуб Улсын Их хурлын гишүүнгүй, итгэл үнэмшлийн үндсэн дээр нэгдсэн залуусын нэгдэл гэдгээрээ онцлог бөгөөд нэг жилийн ойн дээрээ албан ёсоор Ардчилсан намын улс төрийн фракц болж буйгаа зарлалаа.
Фракцын тэргүүнээрээ Ардчилсан намын Үндэсний бодлогын хорооны гишүүн, Улс төрийн зөвлөлийн гишүүн Төрмөнхийн Пүрэвхатанг сонгожээ. Т.Пүрэвхатан нь АН-ын ҮБХ-ны гишүүнээр улиран сонгогдон ажиллаж байгаа ба өмнө нь 2 удаагийн Улсын Их хурлын сонгуульд нэр дэвшиж байсан төдийгүй Барилгын хөгжлийн төвийн захирлаар ажиллаж байсан Ардчилсан намын эмэгтэй лидер улс төрчдийн нэг нь хэмээн зүй ёсоор нэрлэгдэх нэр хүндтэй нэгэн юм.
Новекс фракц нь Ардчилсан намын ҮБХ-ны гишүүн бөгөөд АЗХ-ны Ерөнхийлөгч Э.Галбадрал, ҮБХ-ны гишүүн бөгөөд УТЗ-ийн гишүүн Т.Пүрэвхатан, ҮБХ-ны гишүүн Э.Уртнасан, Г.Төмөрчөдөр, О.Наранбаатар, Ж.Нямаа, Б.Нарантуяа, Х.Байгальмаа, Б.Угтахбаяр, Г.Соёлтуяа тэргүүтэй хатуу 28 ҮБХ-ны гишүүдээс бүрдэж байгаа бөгөөд гишүүд гарын үсэг зурж, цаашид Ардчилсан намын бодлого шинэчлэлд нэгдсэн байр суурьтай оролцохоо батламжилсан юм. Ингэснээр Ардчилсан намын Үндэсний бодлогын хорооны 375 гишүүний 7%-г Новекс клубын залуус дангаараа бүрдүүлж байгаа юм. ҮБХ-ны гишүүдээр хязгаарлагдахгүй Улс төрийн зөвлөлийн гишүүд, Аймаг, Нийслэл, Сум дүүргийн Ардчилсан намын дарга, тэргүүлэгчид, МЗХ-ны дэд ерөнхийлөгчид болон АЗХ-ны тэргүүн дэд, дэд ерөнхийлөгч, тэргүүлэгчид зэрэг 160 гаруй залуусыг эгнээндээ нэгтгэсэн өргөн бүрэлдэхүүнтэй Ардчилсан намын шинэ өнгө төрх Тус фракц нь шинээр элсэхийг хүссэн залуус бүрт үүд хаалгаа нээж буйгаа ийнхүү нэг жилийн ойгоороо мэдэгдлээ.
