“Бид Э.Батбаяр болон түүний гэр бүлийг баян чинээлэг амьдруулахын тулд 15 жилийн амьдралаараа дэнчин тавиагүй”
Орхон аймагт зэсийн овоолго ашигладаг “Зэс-Эрдэнийн хувь” ХХК-ийн хувьцаа эзэмшигчид Хот байгуулалт, барилга, орон сууцжуулалтын сайд Э.Бат-Амгалан болон түүний төрсөн дүү Э.Батбаяр нар 30 тэрбум төгрөг залилуулсан асуудлаар АТГ-д хандлаа. Тус компанийн нийт хувьцаа эзэмшигч, Орхон аймгийн 25000 иргэнийг төлөөлөн, 7000 орчим иргэн Э.Бат-Амгалан, Э.Батбаяр, Б.Дэлгэржаргал шамшигдуулсан асуудлыг шалгуулах өргөдөлд гарын үсэг зурсан байна.
Хохирогчдын төлөөлөл АТГ-ын үүдэнд өнөөдөр /2026.02.13/ мэдээлэл хийлээ.
“Зэс-Эрдэнийн хувь” ХХК-ийн гүйцэтгэх захирал Б.Мөнхбаатар “Манай компанийн санхүү эрхэлсэн захирлаар ажиллаж байсан Энхтайваны Батбаяр болон түүний төрсөн ах, Хот байгуулалт, барилга, орон сууцжуулалтын сайд Э Энхтайваны Бат-Амгалан, мөн түүний найз Б.Дэлгэржаргал нарт холбогдуулан гомдол гаргаж байна. Орхон аймгийн иргэд 2010 онд энэ компанийг үүсгэн байгуулсан. Гэтэл манай компанийн санхүү эрхэлсэн захирлаар ажиллаж байсан Э.Батбаяр бид бүгдийн иргэлийн олох замаар ТУЗ-ийг хууран мэхэлж, 2022 оны аравдугаар сараас энэ бүх үйл ажиллагаагаа эхлүүлсэн байдаг. Түүний үр дүнд манай компани 30 тэрбум зөвхөн НӨАТ хэлбэрээр 30 тэрбум төгрөгийг Э.Батбаярын хувийн компанид алдаад байна. Э.Батбаяр гадаад руу экспорт хийхэд “Зэс-Эрдэнийн хувь” ХХК ямар нэгэн НӨАТ төлөхгүй гэж хэлээд өөрийн компаниараа худалдааг дамжуулсан. 2020 оноос хойш нийт 30 гаруй тэрбум төгрөгийг идэж, шамшигдуулсан. Шамшигдуулсан мөнгөөрөө сайд ахынхаа сонгуульд оролцсон байх магадлалтай. Энэ асуудлыг мөн Хууль зүй, дотоод хэргийн сайд Б.Энхбаяр танилцуулахаар ирсэн. Өмнө нь цагдаагийн байгууллагад хандсан боловч зургаан сарын хугацаанд таг дуугүй байна” гэв.
“Зэс-Эрдэнийн хувь” ХХК-ийн ТУЗ-ийн гишүүн Б.Энхтуяа “Компанийн удирдлагад ажиллаж байсан Э.Батбаяр, түүний найз Б.Дэлгэржаргал нар комапнид асар их хохирол учруулсан. Зөвхөн татвар нэрээр 30 орчим тэрбум төгрөг завшсан. “Зэс-Эрдэнийн хувь” ХХК-ийг Монгол Улсад анх удаа энгийн иргэд өөрсдөө хамтран байгуулж, баялгийнхаа үр өгөөжийг хүртэх жишиг тогтоохоор ажиллаж байна. Гэтэл Э.Батбаяр хувьцаа эзэмшигчдийг, ТУЗ-ийг хууран мэхлэх замаар өөрийн эхнэрийн 100 хувь эзэмшдэг “Би Эй Ти девелопмент партнерс” ХХК-д давуу эрх олгосон. Олон тэрбум төгрөгийн худалдааны гэрээ байгуулах замаар мөнгө шамшигдуулсан. Энэ асуудлыг хууль хяналтын байгууллагаас шалгах ажлыг шуурхайлж өгөхийх хүсэж байна” гэлээ.
Хувьцаа эзэмшигчдийн Tүр хорооны дарга Т.Дөлгөөнтамир “Энэ нөхцөл байдалд Э.Батбаяр шууд буруутай. Э.Батбаяр санхүүгийн аргаар олон мянган иргэний хөрөнгийг шамшигдуулсан нь баримттай. Э.Батбаярын идсэн мөнгийг нийт хувьцаа эзэмшигчид хуваахад 1.5-1.8 сая төгрөг ногдоно. Тиймээс санхүүгийн аргаар энгийн иргэд хүртэх ёстой ногдол ашгийг шамшигдуулсан явдлыг мөлжлөгийгн тогтолцоо гэж харж байгаа. Э.Батбаяр захирлаа та болон танай гэр бүлийг баян чинээлэг, хөрөнгөөр хахсан амьдруулахын тулд бид бүтэн 15 жил амьдралаараа дэнчин тавьж, хөдөлмөрлөөгүй шүү гэдгийг хэлье. Эргэн ирж тайлбараа тавь. Ямар учиртай хулгай хийсэн гэдгээ тайлбарла” гэсэн юм.
Эх сурвалж: News.mn
