“Нээлттэй, цэгцтэй - Ардчилсан Нам” үндэсний аян өчигдөр нээлтээ хийлээ. Аяныг нээж Ардчилсан намын дарга, УИХ дахь Ардчилсан намын бүлгийн дарга О.Цогтгэрэл үг хэлэв. Тэрбээр “Бид цагаан морин жилд эхлүүлсэн ардчиллын үйл хэргээ гал морин жилд дахин шинээр эхлүүлж байна. Энэхүү дахин эхлэлийн стратегийн шилжилтийн үндсэн концепт бол “НЭЭЛТТЭЙ, ЦЭГЦТЭЙ” үзэл санаа юм. Ардчилсан нам өнгөрсөн хугацаанд ямар хаалттай, эмх замбараагүй болсныг бид хангалттай харлаа. Өнөөдрөөс эхлэн 40 хоногт Ардчилсан намын гишүүд дахин шинэчилсэн бүртгэлдээ хамрагдаж, шинэ гишүүдээ бүртгэнэ. Тавдугаар сар гэхэд нам цэгцэрч, 2027-2028 оны нэр дэвшигчдийн нэрс шударга шалгуураар тодрох болно. Би намын даргын хувьд дотооддоо шударга байдлыг хангуулахад анхаарч хэнтэй ч хуйвалдахгүй албан тушаалаар ч, алт мөнгөөр ч худалдахгүйгээр ажиллах болно” гэв.
Ардчилсан намын цахим бүртгэлийн аянд есөн дүүрэг, 21 аймаг, 330 суманд байгаа Ардчилсан намын 200 мянга гаруй гишүүд идэвхтэй хамрагдсанаар цаашид дотоод сонгуулиа зохион байгуулах, саналын эрхтэй гишүүдийн суурь бүртгэл бүрэн хангагдана гэж үзэж байгаа аж.
Намын гишүүд бүртгэлээ хийлгэж, гишүүний татвараа төлж, Ардчиллын гэрэгэ гардан авснаар дотоод сонгуульдаа саналын эрхтэй оролцох, мөн сонгуульт гишүүнд нэр дэвших эрх нээгдэх аж. Урьдчилсан байдлаар энэ оны дөрөвдүгээр сарын 8-нд Ардчилсан намын Их хурлыг товложээ. Тэр хүртэлх хугацаанд бүх шатны дотоод сонгуулийг улс орон даяар зохион байгуулахаар ажиллаж байна гэж Ардчилсан намын Ерөнхий нарийн бичгийн даргын албан үүргийг түр орлон гүйцэтгэгч Д.Амарбаясгалан мэдэгдлээ.
