“Хойноос ирээд хот манайх, хотонд ирээд хонь минийх”, “Чоно борооноор” гэдэг зүйр цэцэг үгийг монголчууд хэлдэг. Тэгвэл үүнтэй ойртуулж ойлгож болох үйл явдал Засгийн газарт тохиожээ.
Учир вэ гэвэл Засгийн газрын хуралдаан дээр Засгийн тэргүүн, Ерөнхий сайдын баруун зүүн гар талд нь Монгол Улсын Тэргүүн шадар сайд болон Шадар сайд нар суудаг. Энэ нь санамсаргүй хэрэг биш бөгөөд Ерөнхий сайдыг “орлох” эрх бүхий албан тушаалтнууд гэж ойлгож болно.
Тэргүүн шадар сайд болон Шадар сайд нар нь эрх баригч МАН-аас томилогдсон албан тушаалтнууд. Өмнө нь Шадар сайдаар ажиллаж байсан С.Амарсайхан Ерөнхий сайдын зүүн гар талд суудаг байсан бол түүний ажлыг шинээр хүлээж авсан Шадар сайд Х.Ганхуяг албан тушаалын зэрэглэлийн дагуу Засгийн газрын хуралдааны үед зүүгн жигүүрийн сайд нарын эхэнд, Ерөнхий сайдын зүүн гар талд уламжлал ёсоор суух ёстой.
Гэтэл өчигдөр Засгийн газрын хуралдаан дээр Шадар сайдаар шинээр томилогдсон Х.Ганхуяг биш, өмнө нь Шадар (“шадар сайд” ч гэж дээ, 1-2 салбар хариуцуулсан төдий, гол нь засгийн газарт эвссэн гэдгээр нь ХҮН-д зориулж “шадар сайд” нэртэй албан тушаал гаргаж өгсөн гэж хэлж болох) сайдаар томилогдон ажиллаж байсан ч дээр гарч сууж байгаагүй Т.Доржханд дээшээ дэвшээд суучихаж.
Энэ бичвэрийн эхэнд дурьдсанчлан “Хойноос ирээд хот манайх, хотонд ороод хонь минийх” гэдэг шиг.
Зүй нь бол шинээр томилогдсон Шадар сайд Х.Ганхуяг эрх баригч намын төлөөлөл гэдгээрээ ч, эрхэлсэн асуудлынхаа эрэмбээрээ ч, аль ч талаас нь бодсон Ерөнхий сайдын дэргэд суух ёстой албан тушаалтан мөнөөсөө мөн ч Х.Ганхуяг сайд хоёрдугаар эгнээнд суужээ.
Энэ асуудал жижиг асуудал мэт боловч төр засгийн эрэмбэ дараалал, эрх мэдлийн хувиарлалт талаасаа ч тоохгүй орхиж үл болох асуудал юм. Бүр ХХ зууны эхэнд Богд хааны дэргэд Халхын хан ноёд чуулахад хэн нь дээр гарч Богдод ойр суух ёстой вэ гэдгийг төрийн ёслолын хэмжээнд нугацтай тогтоодог байсан гэдэг. Зөвхөн “зэрэг нэмсэн” тохиолдолд эрэмбэ ахиж, суудал дээшилдэг байсан уламжлалтай байжээ.
Тэгэхлээр ХҮН-ийн Т.Доржханд МАН-аас илүү “зэрэг нэмчихсэн” гэсэн үг үү гэдэг асуулт үлдэж байна.
