"Ноорог"-ын О.Уламсайхан өнгөрсөн мягмар гарагийн үүрийн 05.00 цагт бусдад хутгалуулж, хагалгаанд орсон. Хагалгаанд орж түүний биеийн байдал дээрдэж буй.
Энэ талаар цагдаагийн байгууллагаас тодруулахад "Цагдаагийн байгууллагад энэ оны 11 дүгээр сарын 11-ний 05.00 цагийн орчимд БЗД-ийн 26 хорооны нутаг дэвсгэрт байрлах нэр бүхий хотхонд манай найзыг хутгалчихлаа гэх мэдээлэл бүртгэгдсэн. Шалгалтын явцад 38 настай, эрэгтэй Д, 25 настай, эрэгтэй У-тай маргалдаж улмаар мэс ашиглаж, биед нь гэмтэл учруулсан бөгөөд хохирогчид эмнэлэгийн байгууллагын тусламж үзүүлж, холбогдогчийг саатуулан шалгалтын ажиллагаа үргэлжилж байна" гэх мэдээллийг өгсөн байдаг.
Харин цахим орчинд түүнийг бусдын гэрт орж, айлын эхнэрт гар хүрч байгаад нөхөр нь тэвчээр алдаад хутгалсан гэх мэдээлэл гарсан. Уг асуудалд түүний найз Ж.Өнөмөнх "О.Уламсайханы хагалгаа амжилттай болж ухаан орсон. Болсон хэргийг тодорхой субъектууд янз бүрээр тайлбарлаж, үндэслэлгүй хуурамч мэдээлэл түгээж буй тул залруулга хийхэд,
Тухайн хэргийг найз нөхдийн маргаан байсан, хамт жагсаж явсан нөхөд нь гэм хор учруулсан гэх үндэслэлгүй мэдээлэл түгээж байна. О.Уламсайхантай ямар нэг холбоо хамааралгүй, таньж мэдэхгүй хөндлөнгийн этгээд үйлдсэн болно. Тус үйл явдлыг санаатайгаар, зориудаар төлөвлөсөн эсэхийг зөвхөн мөрдөн шалгах ажиллагааны эцэст тогтоох тул хэт улстөржүүлэхээс зайлсхийнэ үү.
О.Уламсайхан найзуудын хамтаар айлын гэрт дайрч орж, эхнэрт нь гар хүрсэн гэх мэдээлэл нь ОГТ ҮНДЭСЛЭЛГҮЙ. Хэрэг Уламсайханы гэрийн орцонд болсон. Холбогдох нотлох баримтуудыг мөрдөн шалгах ажиллагааны нууцад хамруулсан тул бидний зүгээс задлах, олон нийтэд түгээх боломжгүй. Гэхдээ олон нийтийн сүлжээнд зориудаар түгээж буй мэдээлэл үндэслэлгүй гэдгийг НОТТОЙ, ХАРИУЦЛАГАтайгаар мэдэгдье.
Сэжигтэн талаас О.Уламсайханы оролцсон жагсаалыг буруутгаж, өдөөн хатгаж, эцэст нь гэм хор учруулсан. Өнөөдөр аливаа иргэн Монгол улсын Үндсэн Хуулиар олгосон жагсаж цуглах эрхээ эдэлснийхээ төлөө аюул заналхийлэл, бие махбод, сэтгэл санаа, нэр төрийн халдлагад өртсөнд тун харамсалтай байна" гэсэн байдаг.
Мөн уг асуудалд О.Уламсайхан өөрөө "Надад тохиолдсон явдлыг элдэв янзаар улстөржүүлэх гээд хэрэггүй, юу ч тодорхой болоогүй байна. Ер нь ч наад зодолдоод байсан талууд чинь бүгд надад дургүй, би алинтай нь ч хамаагүй. Би ямар нэгэн хэрэг хийж, айл гэр рүү дайрч орсон бол аль аль нь хамгийн түрүүнд намайг дуртай нь аргагүй хорьчих эрх мэдэлтэй улс" гэжээ.
Тэгвэл О.Уламсайханы аав М.Отгон хэрэг явдлын тухай "Миний хүү Отгоны Улам сайханы талаар ташаа мэдээлэл маш их хийж байгаад харамсаж байна. Бид хүүдээ санаа тавиад завгүй л байлаа. Өөрийнх нь амнаас болон цуг байсан найз нараас нь сонссоноор бол амьдарч буй байрных нь орцонд таарсан.
Та нарын жагсаалаас болж би хоолноосоо салсан чамайг ална гээд дайрсан байсан. Ахаа уучлаарай гэж уучлалт гуйгаад аргадаад гэрт нь оруулж өгсөн. Гэтэл гэрээсээ хутга барьж гарч ирээд липтэнд орох гэж байхад нь ална гээд дайрсан байсан. Найз нар нь байгаагүй бол миний хүүг алах байсан байна лээ. Болсон явдал нь ердөө л энэ. Найз нарт нь л маш их баярлаж байна. Эмчилж буй алтан гарт эмч нартаа маш их баярлалаа. Бидний амьдарч буй нийгэм ийм хэрцгий байж болохгүй ээ. Өөрчлөгдөх ёстой. Залуус минь амьдарч буй нийгмээ өөрчлөхийн төлөө хүн бүр заавал хичээгээрэй" хэмээн байр сууриа илэрхийлжээ.
