Казахстаны Алматы хотод Болат Турлыхановын нэрэмжит бөхийн төрлүүдийн дэлхийн чансааг олгох тэмцээн өчигдөр эхэлсэн билээ. Өчигдөр сонгомол бөхийн 72, 77, 82, чөлөөт бөхийн 57, 62, 68, 76 кг-ын жингийн урьдчилсан болон шигшээ барилдаан болов.
Манай улсаас дөрвөн бөх барилдснаас нэг мөнгө, хоёр хүрэл медаль хүртсэн байна. Эмэгтэйчүүдийн 68 кг-ын жинд 2021 оны Азийн аварга “Хилчин” спорт хорооны тамирчин ОУХМ Зоригтын Болортунгалаг мөнгө, 62 кг-д “Осло-2021” ДАШТ-ий хүрэл медальт, “Хилчин” спорт хорооны тамирчин ОУХМ Энхбатын Гантуяа, 68 кг-д Азийн АШТ-ий нэг мөнгө, хошой хүрэл медальт “Хасу-Мегастарс” клубийн тамирчин ОУХМ Энхсайханы Дэлгэрмаа хүрэл медалийн эзэн болов.
68 кг-д медальтнууд гурван биенээ тойрч ялсан ч манай бүсгүйчүүд оноо тоолоход мөнгө, хүрэл медальтан болсон юм. Харин 57 кг-д барилдсан ОУХМ Х.Болортуяа медаль хүртэж чадсангүй. Өнөөдөр эрэгтэйчүүдийн 97, 125, эмэгтэйчүүдийн 50, 53, 55, 59, 65, 72 кг-ын жингийн барилдаанууд болно.