Ерөнхий сайд Г.Занданшатар өнөөдөр УИХ-ын гишүүн Б.Энхбаярыг Хууль зүй, дотоод хэргийн сайдаар томилох болсноо мэдэгдсэн. Улмаар Монгол Улсын Ерөнхий сайд Засгийн газрын гишүүнийг томилохдоо Ерөнхийлөгчид танилцуулдаг хуулийн дагуу төрийн тэргүүнд уг томилгоог танилцуулжээ.
Энэ талаар Монгол Улсын Засгийн газрын албан ёсны цахим хуудаст дараах байдлаар мэдээлсэн байна.
Уг мэдээлэлд "Ерөнхий сайд Г.Занданшатар УИХ-ын гишүүн Баттөмөрийн Энхбаярыг Засгийн газрын гишүүн, Хууль зүй, дотоод хэргийн сайдаар томилох асуудлыг Үндсэн хууль болон холбогдох бусад хуулийн дагуу Ерөнхийлөгч У.Хүрэлсүхэд өнөөдөр танилцууллаа.
Б.Энхбаяр 2016-2018 онд Хууль зүй, дотоод хэргийн дэд сайд,
2020-2024 онд Монгол Улсын Их Хурлын гишүүн,
2023 онд Хууль зүйн байнгын хорооны дарга,
2023 оноос Монгол Улсын Засгийн газрын гишүүн, Хууль зүй, дотоод хэргийн сайд,
2024 оноос Монгол Улсын Их Хурлын гишүүнээр ажиллаж байна" гэжээ.
Холбогдох хуулийн заалтууд:
Монгол Улсын Засгийн газрын тухай хуулийн 23 дугаар зүйлийн 1.2-т
Засгийн газрын гишүүнийг Монгол Улсын Их Хурлын чуулганы хуралдааны дэгийн тухай хуулийн 101 дүгээр зүйл, Монгол Улсын Ерөнхийлөгчийн тухай тухай хуулийн 12 дугаар зүйлийн 4 дэх хэсэгт тус тус заасны дагуу Улсын Их Хурал, Ерөнхийлөгчид танилцуулсны үндсэн дээр томилж, чөлөөлж, огцруулна. Засгийн газрын гишүүнийг томилох, чөлөөлөх, огцруулахдаа захирамж гаргана;
Монгол Улсын Ерөнхийлөгчийн тухай тухай хуулийн 12 дугаар зүйлийн 4 дэх хэсэгт
Засгийн газрын гишүүнийг Засгийн газрын бүтэц, бүрэлдэхүүн, түүнд өөрчлөлт оруулах тухай Ерөнхий сайдаас тавьсан саналын талаар түүнтэй зөвшилцөнө. Засгийн газрын гишүүнийг томилох, чөлөөлөх, огцруулах талаар Ерөнхий сайдаас ирүүлсэн саналтай танилцана.
