Л.Оюун-Эрдэнийн ноёрхол олон түмний шахалт дор нуран уналаа. Одоо түүний орлого, зарлагыг шалгах их ажил үлдэж байна. Тэгэхийн тулд өөрийг нь бус хамаарал бүхий этгээдүүдийнх нь хийж, хэрэгжүүлсэн хуудуутай хулгай луйвраас эхлэх нь зүй. Энд хамгийн түрүүнд шалгах ёстой ажил бол Л.Оюун-Эрдэнийн хүргэн гэх Д.Азжаргал ба “Дархан төмөрлөгийн үйлвэр” ТӨХК-ийн захирал Б.Чагнаадорж нарын 2.2 тэрбум төгрөгийн тендрийн асуудал.
Ерөнхий сайд асан Л.Оюун-Эрдэнийн хүргэн Д.Азжаргал өөрийн “Аз транспортэйшн девелопмент” ХХК-аар төрийн өмчит “Дархан төмөрлөгийн үйлдвэр” ХК, түүний захирал Б.Чагнаадоржтой 2.2 тэрбум төгрөгийн өртөг бүхий зургаан сарын хугацаанд вагон түрээсийн гэрээг байгуулсан нь анхаарал татаж байна.
Том мөнгөн дүнтэй тендерт ялна гэдэг амаргүй. Үүх түүх, өмч хөрөнгө, үйл ажиллагаа гээд бүхнээ тоочиж, нотолж байж сая ялдаг, ажлаа авдаг зарчимтай. Гэтэл хүргэн хүү Д.Азжаргалын “Аз транспортэйшн девелопмент” ХХК 2022 оны хоёрдугаар сарын 14-нд байгуулагдаж, мөн оны наймдугаар сард төмөр замын тээвэр зуучлалын үйл ажиллагаа явуулах тусгай зөвшөөрлөө авсан. Төд удалгүй Дархан төмөрлөгийн үйлдвэрийн 2.2 тэрбумын тендрт ялж, төсвийн мөнгийг “угаах” болсон байна.
Төрд ажиллаж байхдаа Harrier автомашинаас өөр хөрөнгөгүй гэж мэдүүлж ирсэн Д.Азжаргал хэдийдээ 50 ширхэг вагонтой болоод шинэ тутам томилогдсон Б.Чагнаадорж түүнийг нь лавлан бататгаад гэрээлсэн нь анзаарахгүй өнгөрч боломгүй үйл явдал. Л.Оюун-Эрэдэнийн хамтарсан Засгийн газар байгуулагдсан цагаас хийгдсэн халаа сэлгээ, хамтралууд чухамдаа энэ мэт тендер зувчуулж, бэрээ эрхлүүлэх бэрх ажиллагааны нэг хэсэг байхыг үгүйсгэхгүй юм.
Тодруулбал, Л.Оюун-Эрдэнийн хийсэн олон томилгоон дотор төмөр замын магнат Б.Дэлгэрсайханыг Зам, тээврийн сайдаар, 30 хүрээгүй “нялх сэнгүм” Б.Чагнаадоржийг “Дархан төмөрлөгийн үйлдвэр” ТӨХК-ийн захирлаар тус тус томилсон байдаг. Б.Дэлгэрсайхан бол монгол улсад явж байгаа 11 мянган вагоны 3000 мянгыг дангаараа эзэмшдэг олигарх. Энэ хүн илүү хол явахын тулд 50 ширхэг вагоныг “цаасан компани”-д бэлэглээд эрх мэдлээ хадгалж, “Бэрх”-ийн хүүг эрхлүүлэх амархан байж таарна. Магадгүй энэ таамгаар хувьдаа хөрөнгөгүй хүргэн хүү Д.Азжаргал 50 ширхэг вагоныг бусдаас “зээлдэж” аваад дамлах замаар ашиг хийсэн байж мэдэхээр байна.
Харин Б.Чагнаадоржийн хувьд даргын даалгасан ажлыг дуулгавартай биелүүлэх давхар үүрэг хүлээж төрийн өмчит компанид томилогдон очиж, үүх түүхгүй хүргэний компанид өм цөмөөр тендер өгсан байх магадлалтай юм.
Өдгөө дөрөвдүгээр сард дууссан уг гэрээний удаах эзнийг тодруулах тендрийг “Дархан төмөрлөгийн үйлдвэр”-ээс зарлажээ. Энэ удаагийн тендр 650 ширхэг ачааны вагон, 100 ширхэг тавцант вагон түрээслэж авах нөхцөлтэй, нийтдээ 72 тэрбум төгрөгийн төсөвтэй. Гэтэл хөл залгах Harrier-аас өөр хөрөнгөгүй гэгдэж байсан хүргэн хүү Д.Азжаргалд энэ тендрийг ахин бэлэглэх тохироо явж байж мэдэхээр байна. Орлогоо нотолж чадаагүй огцорсон Ерөнхий сайдын орлогын эх үүсвэр эндээс эхлэлтэй байж болох уу гэсэн асуулт яг эндээс гарч ирж байна.
Эх сурвалж: Эргэлт.мн 126 сэтгүүл, дугаар-4
