ШХАБ-ын 24 дэх дээд хэмжээний уулзалт Казахстан улсын Астана хотод болж буй.
2001 онд тус байгууллагыг БНХАУ, ОХУ, Казахстан, Киргизстан, Тажикстан болон Узбекистан терроризмтой тэмцэж, хилийн аюулгүй байдлаа дэмжих зорилгоор байгуулж байсан.
Одоо ШХАБ 9 гишүүн, гурван ажиглагч оронтой. Гурван ажиглагч орны нэг нь Монгол юм. Одоо тус байгууллага терроризмтой тэмцэхээс илүүтэйгээр АНУ болон тэдний холбоотон улсуудын ноёрхлыг эсэргүүцэх чиглэлд хөгжиж буй.
Ийм учраас гишүүн орныхоо тоог нэмэх нь Бээжин болон Москвагийн сонирхолд багтана. Энэ жилийн уулзалтаар ажиглагч орнуудын нэг болох Беларусь ШХАБ-ын гишүүн болох төлөвтэй байгаа юм.
Беларусь бол ОХУ-ын хамгийн ойрын холбоотон орнуудын нэг. Тус улс 2022 оны хоёрдугаар сард Украин руу дайрахад ОХУ-д их хэмжээгээр тусалж байсан.
2017 онд ШХАБ анхны удаагаа гишүүн орныхоо тоог нэмсэн юм. Тэр жил тус байгууллага Энэтхэг, Пакистан улсыг элсүүлж нийт 9 гишүүнтэй болсон байна.
Берлин дэх Меркатор Хятад судлалын хүрээлэнгийн (MERICS) Хятадын гадаад бодлогын шинжээч Эва Зайверт “ЕХ-той хиллэдэг Беларусийг элсүүлэх төлөвтэй байгаа нь ШХАБ-ын зорилго сүүлийн жилүүдэд хэрхэн өөрчлөгдсөнийг үнэхээр онцолж байна” гэжээ.
Тэрбээр нэмж “Иранаас ялгаатай нь Беларусийг нэгтгэснээр эдийн засаг, аюулгүй байдлын хамтын ажиллагаа дээшлэхгүй. Ийм учраас би Беларусийг нэгтгэх нь геополитикийн алхам гэж үзэж байгаа” хэмээсэн юм.
