Европын хөрөнгө оруулалтын банкны Экс ерөнхийлөгч Вернер Хойер хэлэхдээ, түүнийг авлига авсан, мөнгө завшсан хэргээр сэжиглэж байгаа нь ямар ч "утгагүй, үндэслэлгүй байна" гэж үзжээ. Хойерыг Европын холбооны Прокуророос шалгаж байгаа гэдгийг өнгөрсөн Даваа гарагт буюу 6-р сарын 24-нд мэдэгдээд байна.
Тэрээр Европын хөрөнгө оруулалтын банканд ажиллаж байгаад халагдсан ажилтанд нөхөн төлбөр олгосон гэх асуудлаар мөрдөн байцаалтын ажиллагаанд Европын холбооны Прокурорын газартай бүрэн хамтран ажиллана гэдгээ мэдэгджээ.
Хойер цахим шуудангаар илгээсэн мэдэгдэлдээ "Намайг ийм хэрэгт буруутгаж байгаа нь үнэхээр утгагүй бөгөөд үндэслэлгүй байна, Европын хөрөнгө оруулалтын банк болон Европын холбооны Прокурорын газар хамтран ажиллаж энэ хэргийг бүрэн шалгаж, үнэн зөвийг тодруулна гэдэгт найдаж байна” хэмээжээ.
Түүний өмгөөлөгчөөрөө дамжуулан илгээсэн мэдэгдэлд Хойер Ерөнхийлөгч байхдаа тус хэрэгт холбогдох баримт бичигт гарын үсэг зурсан нь тухайн байгууллагын ажилтны хийсэн гэрээтэй холбоотой боловч тэрхүү гэрээ хэлэлцээрийг хийхэд Хойер ямар ч оролцоогүй болохыг дурдсан байна.
Түүний өмгөөлөгч Николас Газеас хэлэхдээ “ЕХ-ны Прокурорын газраас эрүүгийн хэрэг үүсгэн шалгаж байгаа энэхүү үйлдэлд хуулийн хүрээний шаардлага маш сул байна” гэж хэлжээ.
ХБНГУ-ын Гадаад хэргийн дэд сайд асан тэрээр хоёр удаагийн зургаан жилийн бүрэн эрхийн хугацаа дууссаны дараа 2023 оны сүүлээр ЕХОБ-ны удирдлагаасаа бууж, түүний оронд Испани улсын Ерөнхий садын орлогчоор 2023 оны 12 дугаар сарын 29 хүртэл ажиллаж байсан эдийн засагч, хуульч мэргэжилтэй Надия Кальвиньо томилогджээ.
ЕХОБ-ны хэвлэлийн төлөөлөгч Euronews-т хэлэхдээ, "гаднаас явуулж буй мөрдөн байцаалтын талаар тайлбар өгөх боломжгүй" гэхдээ прокуроруудтай хамтран ажиллах болно гэв.
ЕХОБ-аас ажлаасаа гарсан нэр нь үл мэдэгдэх хоёр ажилтны халдашгүй эрхийг цуцалж, прокуроруудадын хүсэлтийн дагуу тэднийг байр болон бүртгэлд нэвтрэх зөвшөөрлийг олгожээ.
Энэхүү хүсэлтийг албан тушаалын байдлаа урвуулан ашигласан, авлига авсан, ЕХ-ны сангийн хөрөнгийг зориулалтын бусаар зарцуулсан хэрэгт сэжиглэгдэж буй хоёр хүнд холбогдох мөрдөн байцаалтын хүрээнд гаргасан бөгөөд гэм буруутай нь нотлогдох хүртэл сэжигтнүүдийг гэм буруугүй гэж үзнэ гэж ЕХ-ны Прокурорын газар мэдэгдэв.
