Энэ сарын эхнээс Европын холбоог даргалж эхэлсэн Унгар улсын Ерөнхий сайд Виктор Орбан Киевт өчигдөр гэнэтийн айлчлалаар очсон байна.
Европын холбооны зүгээс Украинд дэмжлэг тусламж үзүүлэхийг илэрхий эсэргүүцэх байр суурь баримталдаг Унгарын Ерөнхий сайд 2022 онд Украин дахь Оросын цэрэг дайны ажиллагаа эхэлснээс хойш анх удаа Киевт хөл тавьж байгааг олон улсын хэвлэлүүд онцолжээ.
Виктор Орбан Украины Ерөнхийлөгч Володимир Зеленскийтэй энх тайван тогтоох боломжийг гол чухалчилж хэлэлцэх бодолтой байгаа гэдгийг Унгарын Ерөнхий сайдын Хэвлэлийн төлөөлөгч Берталан Хаваши мэдээлсэн байна.
Мөн Унгар-Украины харилцааны тулгамдсан асуудлуудыг хэлэлцэхээр төлөвлөсөн байна.
Оросын Ерөнхийлөгч Владимир Путины Европын холбоон дахь хамгийн ойрын холбоотон гэгддэг Виктор Орбаны хувьд Европын холбооноос Украинд үзүүлэх санхүүгийн болон зэвсгийн тусламжид тогтмол саад хориг тавьж, хүчин чармайлтыг нь сулруулах алхмууд хэрэгжүүлж ирсэн гэдгийг Европын хэвлэлүүд тэмдэглэж байна.
Украин болон Унгарын албаныхны мэдээлж байгаагаар, хэдэн сарын турш үргэлжилсэн хэлэлцээний эцэст хоёр улсын удирдагчийн уулзалт болж буй юм байна.
Өрнөдийн удирдагчдын хувьд, үүнээс өмнө Украины дайны туршид Киевийг тууштай дэмжиж байгаагаа илэрхийлж томоохон айлчлалуудыг удаа дараа хийж ирсэн.
Харин Киев, Будапештийн тухайд Украины дайн эхлэхээс бүр өмнө, Украины эрх баригчдын баримталж ирсэн хэлний бодлогын асуудлаас болж хоорондоо зөрчилдөөнтэй явж иржээ.
Учир нь Дэлхийн 1-р дайнаас өмнө Унгарын харьяанд байсан Карпатын нурууны өвөр бүсээр суудаг 100 мянга гаруй мажар үндэстэн өнөө хэр Украинд амьдардаг, тэдний асуудлыг энэ айлчлалын үеэр мөн хэлэлцэхээр төлөвлөжээ.
Тэрчлэн Унгар улс Украинтай хиллэдэг боловч Европын холбооны бусад улстай харьцуулахад илт цөөн дүрвэгч Украинаас хүлээж авсан гэдгийг “Франс пресс” дурдсан байна.
Европын холбоо Украиныг элсүүлж авах асуудлаарх яриа хэлэлцээг албан ёсоор эхлүүлэх шийдвэрийг өнгөрсөн 7 хоногт баталсан, мөн Унгар улс энэ оныг дуустал Европын холбоог даргалагч улсын үүргийг сэлгээгээр хүлээж авсантай давхцаж Виктор Орбаны Украин дахь энэ айлчлал болж байна.
Европын холбоог даргалагч орны хувьд, хэлэлцэх асуудлуудыг товлох, гадаад бодлого, евро бүсийн асуудлаас бусад Европын холбооны бүх салбар хүрээний хуралдаануудад даргалах, хууль тогтоомжийн асуудлаар Европарламенттай хийх хэлэлцээнүүдэд гишүүн орнуудын хооронд зөвшилцлийг хангаж зуучлах чиг үүрэг хүлээдэг байна.
