Хятадын Ухань хотын Тунжи анагаах ухааны коллежийн зүрх судасны эмч, судалгааны ахлах зохиолч Шиаочуан Рао "Агаарын чанар нь зүрх судасны эмгэгтэй өвчтөнүүд болон эмзэг бүлгийн хүн амд шууд сөрөг нөлөө үзүүлж болохыг харуулж байна" гэж хэвлэлд ярьжээ.Тэрээр " Зүрх судасны өвчний эрсдэлийн үнэлгээ, өвчтөний менежментэнд хүрээлэн буй орчны хүчин зүйлс, ялангуяа агаарын бохирдлыг харгалзан үзэх нэн чухал байна” гэдгийг онцолсон байна. Өмнөх судалгаануудаар PM2.5-д өртөх нь цусны даралт ихсэх, атеросклероз, зүрхний шигдээс, цус харвалт үүсэх өндөр эрсдэлтэй болохыг тогтоогоод буй.2019 оны Дэлхийн өвчлөлийн ачааллын судалгаагаар дэлхийн хэмжээнд 6.7 сая хүн нас барахад агаарын бохирдол нөлөөлсөн бөгөөд ялангуяа уушгины хорт хавдраар нас баралтын 15.1 хувь нь PM2.5 бохирдуулагчтай холбоотой байна. Дэлхийн ихэнх хэсэгт агаарын бохирдлын түвшин ДЭМБ-ын PM2.5-ын удирдамжаас тогтмол давж байна. Хотын хүн ам хөдөө орон нутагт амьдардаг хүмүүстэй харьцуулахад PM2.5 бохирдуулагчид хамгийн ихээр өртдөг. Бохирдол ихтэй бүс нутагт амьдарч буй эмзэг бүлгийн иргэдэд зөөврийн агаар цэвэрлэгч буюу халаалт, агааржуулалт, агааржуулалтын системээр дотоод орчны агаарын чанарыг сайжруулахыг ДЭМБ-аас зөвлөж буй. Рао болон түүний хамтрагчид 2000-2023 онд нийтлэгдсэн найман судалгаанд дүн шинжилгээ хийж, PM2.5 зэрэг агаар бохирдуулагч хорт хавдартай өвчтөнүүдийн зүрх судасны эрүүл мэндэд хэрхэн нөлөөлж байгааг судалсан байна. Тэд РМ2.5-д өртөх нь хорт хавдартай өвчтөнүүдийн зүрх судасны өвчнөөр оношлогдох, зүрх судасны өвчлөлөөс шалтгаалсан нас баралтын түвшин өндөртэй холбоотой болохыг тогтоосон байна.“Хорт хавдар, зүрх судасны өвчлөл, эрсдэлт хүчин зүйлсийн хамт хавсарч байгаа нь эмгэг физиологийн механизмууд давхцаж байгааг харуулж байна. Эдгээр механизмууд нь үрэвсэл, дархлаа идэвхжүүлэх, бодисын солилцооны замууд, мэдрэлийн дааврын механизмууд, гэдэсний микробиом зэрэг олон замыг хамардаг" гэж Рао болон багийнхан судалгаандаа онцолжээ.
