![](http://hardnews.mn/wp-content/uploads/2024/07/Untitled-156785-1024x576.jpg)
Шинээр сонгогдсон 126 гишүүний үнэмлэх гардуулах ёслол төрийн ордонд болж өндөрлөлөө. Үүнтэй холбоотойгоор ХҮН намаас УИХ-ын гишүүн Ж.Золжаргал байр сууриа илэрхийллээ.
Тэрбээр, "Төсөв нь цомхон, төр нь цэгцтэй шударга, аж ахуйгаас хол, иргэн баян. Үүний төлөө бид багаараа ажиллана.
НӨАТ-ын буцаан олголтыг нэмэгдүүлнэ. НӨАТ төлөх босгыг нэмэгдүүлнэ. Экспортод гарсан эцсийн бүтээгдэхүүн байх юм бол татварын хөнгөлөлт үзүүлнэ. Гааль, НӨАТ-аас чөлөөлнө. Иймэрхүү байдлаар Монголчуудад өөрсдөө эх орондоо юмаа хийхэд бусад улстай өрсөлдөх чадварыг татварын зохицуулалтаар бий болгохгүй бол бид өрсөлдөөнд ялагдаад, царцаад үлдлээ.
Төр аж ахуй нэгжтэй хутгалддагаас холдож байж, мөнгөний эрх мэдлээс холдож байж улс төр цэвэршинэ. Тийм болохоор төсвийг аль болох цомхон, яг зорилтот хүмүүс рүүгээ хүрдэг байдлыг илүү их дэмжиж байгаа. Мөн боловсрол, эрүүл мэнд. Мэдээж олонх болсон нь шийдвэр гаргаад явна. Бид харин хүчтэй сөрөг хүчний үүргээ биелүүлнэ. Одоогийн байдлаар МАН-аас хамтарсан Засгийн газар байгуулахаар санал тавиагүй байна" гэлээ.