Энэ удаагийн УИХ-ын сонгуульд нэр дэвшиж, ялалт байгуулсан 126 хүнийг УИХ-ын гишүүнээр сонгогдсонд тооцож, үнэмлэх гардууллаа. Энэ үеэр АН-аас нэр дэвшиж, УИХ-ын гишүүнээр сонгогдсон Ш.Бямбасүрэн дараах байр суурийг илэрхийллээ.
Тэрбээр, "Өрсөлдөөн их ширүүн байлаа. Ирэх дөрвөн жилд бизнесийн орчинг маш сайн сайжруулах хэрэгтэй гэж бодож байна.
Манай мөрийн хөтөлбөрт тусгагдсан “Татварын орчинг сулруулах шаардлагатай” агуулгаар ирэх дөрвөн жилд шамдана. Авлигаас 100 хувь ангид ажиллаж чадна. Үүнийгээ ч иргэд, сонгогчдодоо хэлсэн байгаа. Тэгэхээр итгэлийг нь алдахгүй ажиллахын төлөө хичээнэ ээ. Аавынхаа үйл хэргийг цааш нь маш хариуцлагатай авч явах болно" гэлээ.