Япон улсын хамгийн зүүн захын арлын ойролцоо далайн ёроолоос ховор металлын нөөц агуулсан 200 гаруй сая тонн хэмжээтэй чулуулаг илрүүлснээ судлаачдын баг зарлажээ.
Их хэмжээний кобальт, никел агуулсан манганийн бөөгнөрлийг Ниппон Сан, Токиогийн Их сургуулийн хамтарсан баг Минамитори арлын ойролцоо газраас илрүүлсэн бөгөөд удахгүй туршилтын олборлолтыг эхлүүлэхээр төлөвлөсөн байна.
“Энэ бол эдийн засгийн аюулгүй байдалд маш чухал ач холбогдолтой нөөц. Бид далайн байгаль орчинд үзүүлэх нөлөөг хамгийн бага түвшинд байлгах арга замаар жил бүр 3 сая тонныг олборлох зорилготой байна” гэж Токиогийн Их сургуулийн геологийн профессор Ясүхиро Като хэвлэлийн хурлын үеэр ярьжээ.
Түүний удирдсан баг энэ оны дөрвөөс зургаадугаар сарын хооронд далайн ёроолын 100 гаруй хэсэгт 5,200-5,700 метрийн гүнд алсын удирдлагаар ажиллах чадвартай машинаар хайгуул явуулжээ.
Үүний үр дүнд 1,000 км.кв талбай эзэлсэн 230 сая тонн манганийн бөөгнөрлийг илрүүлсэн байна.
Манганийн нэгж бөөгнөрөл нь 5 см-аас хэдэн арван сантиметр хүртэл диаметр хэмжээтэй байдаг бөгөөд олон сая жилийн хугацаанд далайн амьтан, ургамлын үлдэгдлээс ялгарсан металлуудын хуримтлалаар үүсдэг.
Шинэ нөөц 610,000 тонн кобальт, 740,000 тонн никел агуулж байх боломжтой гэж судлаачид тооцоолжээ.
Энэ нь Япон улсын кобальтын хэрэгцээг 75 жил, никелийн хэрэгцээг 11 жил орчим хугацаанд хангах нөөц юм байна.
Судлаачдын баг 2025 онд туршилтын олборлолтыг эхлүүлэхээр төлөвлөжээ.
Хүн амьдардаггүй Минамитори арал нь Токио хотоос зүүн өмнө зүгт 1,800 км орчим зайд оршдог. Энд зөвхөн Японы өөрийгөө хамгаалах зэвсэгт хүчний алба хаагчид байрладаг юм.
Тус арлыг тойрсон 430,000 км.кв талбайтай далайн хэсэг Япон улсын эдийн засгийн тусгай бүсэд багтдаг. Судлаачид энэ хэсгийн далайн ёроолд өндөр технологийн түүхий эд болдог төрөл бүрийн ховор металлын нөөц байх магадлалтай гэж үздэг байна.
