Гуравдугаар сард Японд ховор ч гэсэн бактерийн халдварын ноцтой хүндрэлийн тоо эрс нэмэгдэж байна гэх мэдээлэл явсан.
Тэгвэл Стрептококкийн хордлогын хам шинж (STSS) нэртэй тус хүндрэлийн тохиолдол энэ жил гарснаас хойш мянга давсан байна.
Өнгөрсөн жил Японд STSS-ийн 941 тохиолдол бүртгэгдэж байсан нь 1999 оноос хойш үзэгдээгүй их тоо юм. Тэгтэл энэ оны эхний зургаан сард л гэхэд мянган тохиолдол бүртгэгджээ.
Үндэсний халдварт өвчин судлалын хүрээлэн мягмар гарагт /2024.06.18/ гаргасан урьдчилсан тоо баримтаар, энэ жилийн тохиолдлын тоо зургаадугаар сарын 9-ний байдлаар 1,019 болсон байна.
Стрептококк нь А, B бүлгийн гэх мэт олон төрөлтэй. А бүлгийн стрептококк нь фарингит (ангина) үүсгэдэг. Энэ төрөл нь өвөл болон хавар хүүхдүүдийн дунд ихэвчлэн тархдаг. Халдвар аваад хүндэрсэн тохиолдол ховор гардаг эмгэг төрүүлэгч юм.
Тус бактер нь үхжилт фасцит гэдэг өвчний үүсгэдэг голлох бактери тул “мах идэгч” гэж нэрлэгдсэн байна. Үхжилт фасцитын үед булчингийн хальс болон арьсны хамгийн гүн бүрхүүлд эдийн үхжил үүсдэг.
Гэхдээ стрептококк А шархаар дамжин биед нэвтэрвэл үхлийн аюултай STSS гэх хүндрэл үүсгэдэг. Стрептококкийн хордлогын хам шинж болсон тохиолдолд өвчтөний бие маш хурдан муудаж, амь эрсдэх аюултай.
Уг хам шинжээр хүндэрсэн өвчтөнүүдийн 30 хувь нь нас бардаг байна. Японы Эрүүл мэндийн яамны төлөөлөгч “Бид тодорхой шалтгааныг мэдэхгүй байгаа ч стрептококкоор үүсгэгдсэн фарингиттай өвчтөнүүдийн тоо нэмэгдэж байгаа бөгөөд энэ нь STSS-ийн тохиолдол өсөхөд нөлөөлж байна гэж үзэж байна" гэж хэлжээ.
Тус яам иргэддээ амны хаалт зүүх, гараа угаах, шархаа цэвэрхэн байлгах гэх мэт халдвар хамгааллын энгийн дэглэмийг баримтлахыг уриалсан байна.
