Цагдаагийн байгууллагаас долоо хоног бүрийн лхагва гарагт сонгуулийн хууль, тогтоомж зөрчсөн зарим асуудлаар мэдээлэл хийж байгаа.
Энэ талаар ЦЕГ-ын Хэвлэл мэдээлэл олон нийттэй харилцах хэлтсийн дарга, дэд хурандаа Г.Пүрэвдэлгэр “Сонгуультай холбоотой гэмт хэрэг, зөрчлийн 468 гомдол, мэдээлэл бүртгэгдээд байна. Үүнээс гэмт хэргийн шинжтэй 183, зөрчлийн шинжтэй 285 гомдол мэдээлэл бүртгэгдсэн.
Шийдвэрлэсэн 327 гомдол мэдээлэл байгаа бол яг одоогоор 141 гомдол мэдээлэл шалгаж байна” гэлээ.
Мөн Зөрчлийн хэрэг бүртгэх албаны чиглэлийн ахлах байцаагч Э.Саруул “Өнгөрсөн 7 хоногийн лхагва гарагт мэдээлэл танилцуулахад нийт 162 гомдлыг шалгаж байсан бол өнөөдрийн байдлаар 468 гомдол болж өсжээ.
Гомдолд мэдээллийг зүйлчлэлээр танилцуулбал, дийлэнх нь буюу 117 нь, 63.9 хувь нь сонгуулийн үеэр илтэд худал мэдээлэл тараах зөрчил байна. Сонгуультай холбоотой илт худал, хууль бус мэдээллийг Мета компанид хүргүүлж байна” гэлээ.
