Засгийн газраас 2024 онд "Go Mongolia" уриан дор аялал жуулчлалыг идэвхжүүлэхээр зорилго тавьсан. Энэхүү зорилтын хүрээнд Зам, тээврийн хөгжлийн яамнаас санаачлан олон улсын чанартай авто зам дагуух буудал, хоолны газар, авто засварын төв, эмийн сан зэрэг үйлчилгээний байгууламжийн байршил зүйн зураг, үйл ажиллагааны цагийн хуваарь, зурган мэдээллийг "Google мap" системд байршуулахаар болжээ. Энэхүү ажлыг "И-Тек" компаниар гүйцэтгүүлэхээр гэрээ байгуулсан байна.
Эхний ээлжид баруун бүс буюу Улаанбаатар-Арвайхээр-Баянхонгор-Алтай-Ховд -Баян-Өлгий-Улаангом-Улиастай-Тосонцэнгэл-Цэцэрлэг-Хархорин-Булган-Орхон-Дархан-Улаанбаатар чиглэлийн олон улс, улсын чанартай авто зам, түүний дагуух үйлчилгээний байгууламжийн зургийг стандартын дагуу тоноглосон машинаар явж, 360 градусын өнцгөөр авч “Google map” систем рүү оруулах ажээ.
Мөн Булган боомтоос Цагааннуур боомт хүртлэх олон улсын АН4 авто замын зургийг оруулахаар төлөвлөжээ. Энэ үйл ажиллагаа нь зөвхөн авто замаар хязгаарлагдахгүй түүний ойролцоох сум, суурин газар, мөн аялал жуулчлалын бүс нутаг, байгалийн үзэсгэлэнт, түүхэн дурсгалт газруудын байршлын зураг, мэдээллийг оруулах юм байна.
