ОХУ-ын ерөнхийлөгч Владимир Путин БНАСАУ-д айлчилж, АНУ тэргүүтэй улсуудын хоригийн эсрэг авах арга хэмжээний талаар тус улстай хэлэлцэж, хамтран ажиллахаар болов.БНАСАУ-ын хувьд цөмийн зэвсэг болон пуужингийн хөтөлбөрийн улмаас НҮБ-ын Аюулгүйн Зөвлөлийн эдийн засгийн хатуу хориг арга хэмжээтэй учирсан бол ОХУ-ын хувьд Украинтай хийж буй дайны асуудлаар АНУ ба түүний холбоотон улсууд тус улсад эдийн засгийн хориг тавиад байгаа билээ. В.Путины мэдэгдсэнээр ОХУ болон БНАСАУ баруунаас хараат бус худалдаа арилжаа, төлбөрийн системийг хөгжүүлнэ гэв. “Хоёр улс шударга ёс, тусгаар тогтнол, бие биенийхээ ашиг сонирхлыг харилцан хүндэтгэх олон улсын зарчимд “саад учруулж” буй барууныхныг цаашид ч эсэргүүцэх болно” гэж В.Путин мэдэгджээ. Энэхүү уулзалтаар ОХУ-аас БНАСАУ-д эдийн засаг, техник технологийн тусламж үзүүлэх бол БНАСАУ-аас ОХУ-д Украинтай хийж буй дайнд шаардлагатай зэр зэвсгийг нийлүүлэх асуудал яригдах магадлалтай хэмээн АНУ болон БНСУ-ын зүгээс үзэж байна. Харин ерөнхийлөгч В.Путин ийм хэлэлцээр огт хийж байгаагүй хэмээн эсэргүүцэв.Түүнчлэн хоёр улс цаашид соёл, аялал жуулчлал, боловсролын салбарууд дахь хамтын ажиллагаагаа тэлэх ажээ. Талууд дээрх асуудлуудаар хэд хэдэн хэлэлцээр хийх бөгөөд иж бүрэн стратегийн түншлэлийн гэрээнд ч гарын үсэг зурах магадлалтай.В.Путин 2000 оноос хойш тус улстай хамтран ажиллаж байгаа бөгөөд анх 2019 онд удирдагч Ким Жон Унтай уулзаж байжээ. Тэдний энэхүү уулзалт талуудын “ялагдашгүй, бат бөх” харилцааг илэрхийлж байна хэмээн БНАСАУ-ын хэвлэл мэдээллүүд онцлов.Ерөнхийлөгч В.Путин БНАСАУ-д хийсэн айлчлалынхаа дараа Вьетнам улсад айлчлахаар төлөвлөж байгаа бөгөөд АНУ-ын тал В.Путины эдгээр айлчлалд шүүмжлэлтэй хандаж байна. Эх сурвалж: Associated Press, CNN
