АНУ-ын төлөөлөгчид мягмар гарагт Энэтхэгийн Химачал Прадеш мужийн Дарамсала хотод айлчилж, Төвөдийн шашны удирдагч Далай ламтай уулзсан нь Бээжингийн дургүйцлийг хүргэв.Төлөөлөгчдийн танхимын дарга асан, Ардчилсан намын удирдагч Нэнси Пелоси тэргүүтэй хоёр намын төлөөлөгчид Төвөдийн автономит эрхийг дэмжиж байгаагаа онцолжээ. Төвөдөд автономит эрх олгохыг уриалж буй Төвөдийн дүрвэгсдийн Засгийн газрын оюун санааны удирдагч Далай лам 1960-аад оноос хойш Энэтхэгт амьдарч байна.Бээжин Төвөдийн автономит байдлыг дэмжих аливаа үйл ажиллагааг дотоод хэрэгт нь хөндлөнгөөс оролцсон гэж үздэг. Хятадын ГХЯ-ны хэвлэлийн төлөөлөгч Лин Жиан Бээжин энэ айлчлалыг эсэргүүцэж буйгаа илэрхийлсэн байна. Мөн Шинэ Дели дэх Хятадын Элчин сайдын яам мэдэгдэл нийтэлж, Хятадад өгсөн амлалтаа биелүүлэхийг АНУ-аас хүссэн байна.Хятадын талаас эсэргүүцсэн ч төлөөлөгчид лхагва гарагт Химачал Прадеш мужийн МакЛеод Ганж дахь Далай ламын өргөөнд зочилжээ. Төлөөлөгчдийн бүрэлдэхүүнд багтсан Төлөөлөгчдийн танхимын Гадаад харилцааны хорооны дарга, Бүгд найрамдах намаас нэр дэвшигч Майкл Маккаул хэвлэл мэдээллийн хэрэгсэлд хэлэхдээ, АНУ-ын Ерөнхийлөгч Жой Байден Төвөдийн маргааныг шийдвэрлэхийн тулд Хятадад шахалт үзүүлэх зорилготой хуулийн төсөлд удахгүй гарын үсэг зурна гэжээ.“Төвөдийг шийдвэрлэх тухай хууль” нэртэй хоёр намын хууль тогтоомж нь Төвөдэд үзүүлэх АНУ-ын дэмжлэгийг нэмэгдүүлэх, Хятад болон Далай ламын хооронд олон жил үргэлжилж буй маргааныг энхийн замаар шийдвэрлэхийн төлөөх яриа хэлэлцээг дэмжих зорилготой байна.Эргэн сануулахад, Пелоси 2017 онд Далай ламтай уулзахаар Энэтхэгт айлчилж байсан нь Бээжингийн эрх баригчдыг мөн л уурлуулж байсан юм.Эх сурвалж: RT.com
