Зуны спортын XXXIII наадам эхлэхэд 56 хоног дутуу байхад Монголын жүдо бөхийн холбооноос олимпын наадамд оролцох бүрэлдэхүүнээ урьдчилсан байдлаар зарлалаа. Олон улсын олимпын хорооноос зарласан чансаагаар Монголын жүдочид эрэгтэй тав, эмэгтэй тав, нийт 10 жинд эрхээ авчээ. Эрэгтэйчүүдийн 60 кг-д дэлхийн аваргын мөнгөн медальт Э.Ариунболд олимпод оролцоно. Тэрбээр олимпын чансаанд 13 дугаарт эрэмбэлэгдсэн юм. Тэгвэл 66 кг-д гавьяат тамирчин Ё.Басхүү, олон улсын хэмжээний мастер Б.Эрхэмбаяр нарын нэгийг сойно. Эрхэмбаяр олимпын чансаанд гуравт, Ё.Басхүү тавдугаарт эрэмбэлэгдсэн бөгөөд хэнийг нь Парис руу илгээхээ холбооны удирдлагууд болон дасгалжуулагч нар хуралдсаны дараа шийдвэрээ гаргах юм.Харин 73 кг-д нэгэн сонирхолтой шийдвэр гарч буй бололтой. Дэлхийн аварга, олимпын хүрэл медальт Ц.Цогтбаатар бэртлийн улмаас Парисын наадмыг өнжиж магадгүй аж. Одоогоор урьдчилсан байдлаар олон улсын хэмжээний мастер Б.Эрдэнэбаярыг сойхоор шийдсэн байх юм. Ц.Цогтбаатар гавьяатын хувьд бэртлийн улмаас ДАШТ-д зодоглоогүй бөгөөд гэмтэл нь нэлээд зовуурьтай байгааг хэллээ. Гэхдээ эцсийн шийдвэр гараагүй бөгөөд Монголын жүдо бөхийн холбооноос Парисыг зорих тамирчдын нэрийг албан ёсоор зарлахдаа 73 кг-д хэнийг сойхоо эцэслэн зарлана.
Б.ЭрэдэнбаярТэгвэл -100 кг-д Б.Гончигсүрэн, +100 кг-д О.Цэцэнцэнгэл нар барилдах юм. Б.Гончигсүрэнгийн хувьд бэртлийн улмаас ДАШТ-д оролцоогүй ч олимпоос өмнө бэртлийг нь бүрэн эдгээхээр эмч, мэргэжилтнүүдийн баг ажиллаж байна.Эмэгтэйчүүдийн 48 кг-д шинэхэн дэлхийн аварга Б.Баасанхүү зодоглох нь тодорхой боллоо. Дөрвөн тэмцээнд дараалан түрүүлсэн түүнийг медаль авах найдвар илүү гэж үзсэн байна. ДАШТ-ий үеэр олон улсын хэмжээний мастер Г.Наранцэцэг түүнд амжилт хүсэж, олимпод оролцох бэлтгэлийг нь хангалцан, бүх чадлаараа туслахаа илэрхийлсэн байдаг. Харин 52 кг-д Л.Сосорбарам, 57 кг-д Л.Энхрийлэн, -78 кг-д О.Хүслэн, +78 кг-д А.Адъяасүрэн олимпод Парисын татамид барилдана.Тэгвэл эрэгтэйчүүдийн 81, 90, эмэгтэйчүүдийн 63, 70 кг-ын жинд монгол жүдоч зодоглох боломжгүй болж байна.Манай жүдочид 1972 оны Мюнхений олимпоос эхлэх оролцож эхэлсэн бөгөөд өнгөрсөн хугацаанд нэг алт, зургаан мөнгө, дөрвөн хүрэл медаль хүртжээ.Парисын Олимпын жүдо бөхийн тэмцээн долдугаар сарын 2-ны бямба гарагт эхэлж, наймдугаар сарын 3-ны бямба гарагт өндөрлөнө. Хэсгийн барилдаан Улаанбаатарын цагаар 16:00 цагт, медалийн төлөөх барилдаан 22:00 цагаас эхлэх хуваарьтай байна. Өдөрт хоёр жингийн барилдаан болох бөгөөд долдугаар сарын 27-нд эмэгтэйчүүдийн 48, эрэгтэйчүүдийн 60 кг-ын жингийн барилдаан болох юм. Жүдо бөхийн тэмцээний тасалбарын үнэ 205 еврогоос эхэлж байгаа бөгөөд финал, суудлын байдлаас шалтгаалан үнэ өсөх ажээ.
