Цагдаагийн байгууллагад 2024 оны дөрөвдүгээр сарын 25-ны өдрийн 19 цаг 20 минутын үед иргэн “Н”-аас өөрийн төрсөн ах Г.Батбаярыг оршин суух хаягтаа ирээгүй тул эрэн сурвалжлуулах талаар өргөдөл гаргасан талаар өмнө нь мэдээлсэн. Өргөдлийн дагуу цагдаагийн байгууллагаас тухайн иргэнийг олж тогтоох чиглэлээр шуурхай эрэн сурвалжлах ажлыг зохион байгуулж, Хан-Уул дүүргийн 22 дугаар хорооны нутаг дэвсгэрт байрлах "Богд хаан" амралтын газрын автомашины зогсоолд байрлуулсан автомашинд амь хохирсон байдалтай байхад нь олсон. Хариан өнөөдөр буюу дөрөвдүгээр сарын 30-ны өдөр цагдаагийн байгууллагаас энэ хэргийн талаарх мэдээллийг өглөө.
ЦЕГ-ын Урьдчилан сэргийлэх газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр дараах мэдээллийг өглөө.
Хэргийн газрын эхний ээлжийн үзлэгээр талийгаачийн автомашинаас буу, сум, хонгио олдсон ба тухайн буу нь өөрийнх нь эзэмшлийн буу байсан нь тогтоогджээ. Харин гэрээслэл олдоогүй аж. Хохирогч буудуулсан байдалтай олдсон, шүүх шинжилгээний хариу 14 хоногийн дараа гарах учраас одоогийн байдлаар хэрхэн яаж амиа алдсан, хохирогч амиа алдахдаа согтууруулах ундаа хэрэглэсэн байсан уу гэх мэдээллийг өгөхгүй боломжгүй байна гэлээ. Түүнчлэн өмгөөлөгч Г.Батбаяр нас барахаасаа өмнө хэрэгт шалгагдаж байсан нь үнэн гэдгийг мэдээллээ.
