Олон улсын атомын энергийн агентлаг мягмар гарагаас эхлэн Фүкүшима цахилгаан станцын Номхон далайд гаргаж буй усны цацраг идэвхийн хэмжээг шинжилж эхэллээ. Сүйрсэн атомын цахилгаан станцын ашигласан усыг далайд гаргахтай холбоотой хэд хэдэн үл ойлголцол үүссэн ч олон улсын атомын энергийн агентлаг “Аюулгүй” хэмээн баталсан юм. Ийнхүү өнгөрсөн оны наймдугаар сараас хойш хийгдэж буй хоёр дахь удаагийн шинжилгээ юм.
Шинжилгээний багийг ахалж буй Олон улсын атомын энергийн агентлагийн төлөөлөгч Густаво Карузо “Япон улс ОУАЭА-гийн хяналт шалгалтыг дэмжин хамтран ажиллаж байгаад таатай байна. Ингэснээр энэхүү төслийг аюулгүй, ил тод явуулах боломжийг нээж байна. Энэхүү хараат бус, шинжлэх ухаанд суурилсан арга барил нь нийт япончууд төдийгүй бусад орны ард түмэнд итгэх итгэлийг бий болгоход тусална” хэмээн тус улсын гадаад хэргийн яаманд хийсэн нээлтийн хуралдааны үеэр хэлжээ.
Мөн тэрээр шинжилгээний дүн долоо хоногийн сүүлээр гарч, хоёр дахь тайланг гаргана гэлээ. Олон улсын атомын энергийн агентлагийн шинжээчдийн бүрэлдэхүүнд Аргентин, Австрали, Их Британи, Канад, Хятад, Франц, Орос, Өмнөд Солонгос, АНУ, Вьетнам зэрэг олон улсын бие даасан шинжээчид багтжээ.
Н.ЖАРГАЛМАА
Эх сурвалж: “Зууны мэдээ” сонин
