Швед улс нь 1972 оноос эхлэн иргэдийнхээ хүйсээ солиулах асуудлыг хуулиндаа тусгасан. Ингэснээрээ иргэддээ ийм төрлийн сонголт, эрх чөлөөг олгосон анхны улс болж байсан юм. Харин энэ удаад Швед улсын Засгийн газар гэрчилгээн дээрх хүйсээ сольж болох албан ёсны нас 18 байсныг 16 болгож, мэс ажилбараар хүйс солиулах шаардлагыг хөнгөвчлөх хуулийг баталсан байна. Гэсэн ч энэ хуулийн өөрчлөлт маргаантай байгаа аж.
Учир нь энэ шийдвэрийг гаргахдаа илүү сайн судалгаа хийх нь зүйтэй хэмээн үзэж байгаа хэсэг байгаа юм байна. Энэ өөрчлөлтийг дагаад өөрчлөх шаардлагатай зүйлс, дагаж гарах үр дагаврыг нь илүү сайтар судалсны эцэст шийдэх нь зөв гэж байгаа аж.
Өөрөөр хэлбэл хуулийн төсөл санаачилсан улс төрчдийн хэлснээр ихэнх швед иргэнд энэ хууль ямар ч хамааралгүй мэт боловч трансжендер хүмүүст маш том өөрчлөлт авчрах хууль юм.
Одоогийн хуулиар хэрэв иргэн эмчийн бичгээр баталгаажсан “хүйсийн дисфори” гэсэн оноштой бол мэс ажилбараар хүйсээ солиулах боломжтой байдаг. “Хүйсийн дисфори” гэдэг хүний төрөлх хүйс нь өөрөө өөрийгөө тодорхойлж буй хүйстэй нь нийцэхгүй байхыг хэлдэг.
Харин 2025 оны долоодугаар сараас эхлэн хэрэгжих шинэ хуулийн дагуу онош тодорхойлуулах шаардлагагүй буюу эмч эсвэл сэтгэлзүйчтэйгээ зөвлөлдсөний үндсэн дээр Эрүүл мэндийн үндэсний зөвлөлөөсөө зөвшөөрөл авсан л бол хүйсээ сольж болох боломжтой болох юм байна. Хэрвээ мэс ажилбараар хүйсээ солих бол доод нас нь 18 хэвээр байх юм.
| Эх сурвалж: www.theguardian.com |
