ЗГХЭГ-ын дарга Д.Амарбаясгалан “Гурилын үнэ 2018 онд 1040 төгрөг байсан бол 2023 онд 2426 төгрөг болж нэмэгдсэн. Тэгвэл гурилын гол түүхий эд улаанбуудайн үнэ 2018 онд 600 төгрөг байсан бол 2023 онд 750 төгрөг буюу 5 жилийн хугацаанд 150 төгрөгөөр өссөн байгаа юм.
2021-2023 онд ЗГ-аас гурил үйлдвэрлэгчдэд 209 тэрбум төгрөгийн хөнгөлөлттэй зээл олгосон. Гэрээний хугацаанд гурилын үнийг зохиомлоор өсгөхгүй, хангамжийн тогтвортой байдлыг хангана гэсэн ч энэ үүргээ биелүүлээгүй гэдгийг ШӨХТГ-аас дүгнээд байна.” хэмээн мэдээлэл өгсөн.
Тэгвэл түүний өгсөн энэ мэдээллийг “Алтан тариа” ХХК-ийн гүйцэтгэх захирал П.Цэнгүүн худал мэдээлэл хэмээн үгүйсгээд буй. Тэрээр “ Гурил үйлдвэрлэгчид нэг тонн улаанбуудайг 700 мянган төгрөгөөр авдаг гэдэг худал. 2023 онд 1 сая төгрөгөөр авсан байдаг. Гурилын өртгийн 90 хувийг биш 65 хувийг улаанбуудай эзэлдэг. Дөрөв нугалж ашиг олдог гэдэг нь ч худал” гэх мэтээр өөрийн үйлдвэрлэлийн тооцоолол дээр үндэслэн зарим баримтыг дэлгэсэн юм.
П.Цэнгүүн захирал үүгээр зогсохгүй “ Би уг нь сонгуульд хэнийг ч дэмжихгүй, хэнд ч мөнгө зарцуулахгүй, санхүүжүүлэхгүй гэдэг байр суурьтай байдаг.Сүүлийн үед худал хуурмаг түгээж буй зарим нэр дэвшигч нарыг унагахад мөнгө зарцуулах нь зөв юм байна. Үйлдвэрлэл,бизнес, улс орноо унагаж буй хүмүүсийг унагахад оролцоно” гэж өөрийн байр суурийг ил илэрхийлсэн. Харин өнөөдөр сошиал хуудсаараа дамжуулан ЗГХЭГ-ын дарга Д.Амарбаясгалан, тариалан эрхлэгч Л.Цандэлэг нарыг шүүхэд өгөхөөр болсноо зарлав. Үүнийгээ “ Хүнсний үйлдвэрлэл уул уурхай, банк санхүү шиг өндөр ашигтай салбар огт биш. Тайлан балансаас харж болно. Гурилын үйлдвэрлэл рүү эрээ цээргүй дайрч, доромжилж худал хуурмаг тарааж, нэр хүндэд нь халсан энэ хоёр хариуцлага хүлээх болно” гэж тайлбарлажээ.