Японы мэргэжлийн сүмо бөхийн 69 дэх их аварга Хакүхо М.Даваажаргалын өвлөж авсан “Миягино”-г хаах саналыг одоо дэвжээг нь хариуцан ажиллаж буй “Исэгахама” галын ояката нар гаргасан. Улмаар Сүмогийн холбоонд саналаа хүргүүлсэн байдаг. Хэрвээ энэ саналыг холбоо хүлээж авбал ирэх сарын 1-нээс дэвжээг албан ёсоор хаах юм.
Тэгвэл дэвжээг хаахыг эсэргүүцэн “Миягино”-г дэмжигчид болон ивээн тэтгэгчид гарын үсэг цуглуулж эхэлсэн байдаг. Өчигдөр оройны байдлаар 6045 хүний гарын үсэг цугласан бөгөөд энэ тоо 7500-д хүрвэл Сүмогийн холбооны удирдлагуудыг уг асуудлыг дахин хэлэлцэх юм.
Харин “Хочи ньюс”-ийн мэдээлснээр дээрх асуудлыг дахин хэлэлцэхээр удахгүй тов гаргах гэнэ. Уг хуралд Сүмогийн холбооны удирдлагууд болон хаах саналыг анх гаргасан “Исэгахама” галын ояката нар оролцох аж.
“Миягино” дэвжээг түр хаасан бөгөөд дэвжээний бөхчүүдийг “Ошима” руу шилжүүлэхээр төлөвлөж байгаа аж. Харин ёкозүна Хакүхог “Исэгахама” дэвжээнд үлдээх төлөвлөгөөтэй байгаа бөгөөд энэ асуудлыг мөн дээрх хурлаар шийдэх бололтой.
“Миягино” дэвжээний дэмжигч, үзэгчид “Шавь бөхийн үйлдсэн зодооны хүчирхийллийн хэргээс болж, “Мияагино” дэвжээг хаах тухай Японы сүмогийн холбооны шийдвэрийг хатуу эсэргүүцэж байна. Өмнө нь төстэй дуулиан дэгдээсэн хэргүүдэд авсан шийдвэртэй харьцуулахад илүү хатуу шийтгэл гэж үзэж дээрх шийдвэрийг хүлээж авах боломжгүйг мэдэгдэе” хэмээн байр сууриа илэрхийлсээр байгаа юм.
Хаврын тэмцээнд “Миягино” дэвжээг түр удирдаж байгаа Тамагаки ояката сэтгүүлчдэд ярилцлага өгөхдөө тус дэвжээний зарим бөх зодог тайлах гэж байгаа талаар мэдэгдсэн байна.
Тэрээр “Миягино” дэвжээний бөхчүүдийг тараах яриа гарсны дараа нэлээд хэдэн бөх зодог тайлахаар шийдсэнийг мэдсэн. Хэн хэн үлдэж, хэн нь болих гэж байгааг би мэдэхгүй. Миягино оякатагийн удирдлага дор бэлтгэл хийж, хүчтэй болохоор сүмод орж ирсэн сүмочдын сэтгэлийг бодохоор би ч сэтгэл зовниж байна. Гэхдээ би зодог тайлахаар шийдсэн сүмочдод яаруу шийдвэр битгий гарга гэж хэлмээр байна. Юуны өмнө өөр дэвжээнд очоод барилдаад үз л дээ. Тэгээд болохгүй бол болиход оройтоод байх зүйлгүй шүү дээ” гэжээ.
