Азийн Аваргуудын лигийн шигшээ наймын хариу тоглолт Арабын Нэгдсэн Эмиратын "Аль-Айн" болон Саудын Арабын "Аль Насср" багуудын хооронд явагдлаа.
Хоёр багийн эхний учраанд Марокко хөлбөмбөгчин Рахими гоолдсоноор "Аль-Айн" талбайдаа 1:0-ээр ялалт байгуулаад байв.
Хариу тоглолтын гоолын салхийг мөн л Рахими нээсэн төдийгүй эхний хагаст түүний оруулсан хоёр гоолоор зочид давамгайлсан юм.
Гэлээ ч "Аль-Насср"-ын тоглогчид хоёрдугаар хагаст дараалан гоолдож, 72 дахь минутад "Манчестер Юнайтед"-ийн тоглогч асан Алекс Теллес гоолдсоноор 3:3 болгож тэнцүүлсэн.
Гэвч нэмэлт цагт Айман Яхья улаан хуудсаар торгуулж, тэд талбайд арвуулаа үлдсэн юм.
Эл явдлаас таван минутын дараа зочин баг гоолдож, давуу байдал ч тэдний талд эргэв. Гэхдээ 118 дахь минутад Криштиано Роналду торгуулийн цохилтоос гоолдон, багтаа ялах боломжийг хадгалж үлдсэн.
Улмаар ялагчийг торгуулийн цохилтоор тодруулахад "Аль-Айн" багийнхан бүгд цохилтоо амжилттай болгосон бол "Аль-Насср"-аас гагц Роналду л гоолдож, Брозович, Теллес, Отавио нар цохилтоо алдснаар тэд Аваргуудын лигээс хасагдлаа.
"Аль-Айн" клуб эл тэмцээнд 2003 онд түрүүлж, 2015, 2016 онуудад мөнгөн медаль зүүж байсан амжилттай. Харин дэлхийн шилдэг хөлбөмбөгчин Криштиано Роналду, Садио Мане нарын тоглогчдоор хүч зузаатгасан "Аль-Насср" 1995 онд финалдсан ч, өдийг хүртэлх хугацаанд аваргын цомд хүрч чадаагүй байгаа юм.
