Үндэсний алтан цомын төлөө өрсөлдөх шилдэг найман баг албан ёсоор тодорлоо. Өчигдөр, уржигдар сүүлийн хоёр хэсгийн барилдаан болоход Төв, Ховд, Өвөрхангай, Говьсүмбэр аймгийн баг дараагийн шатанд шалгарлаа. Ингэснээр найман багийн ирц бүрдэж байна.
Өрсөлдөөнгүй, уйтгартай барилдаанаас Төв, Ховдын бөхчүүд наймд үлдлээ
Төв аймгийнхан энэ тойрогт өрслөдөгчөө 19:6-гаар илүүрхсэнээр хэсгийнхээ хоёрдугаар байраар шалгарч байгаа юм. Бүрэлдэхүүнд улсын начин Г.Ганжад, Д.Хүдэрбулга, аймгийн арслан П.Эрхэмжаргал, Л.Даваажамц, Н.Дашдаваа, Л.Энхтүвшин багтжээ. Дасгалжуулагчаар улсын харцага Л.Бадарч, Ө.Даваабаатар нар ажиллав. Тус багаас аймгийн арслан Л.Даваажамц ганцаараа тав давж, бусдыгаа манлайлсан бол улсын начин Д.Хүдэрбулга, аймгийн арслан Л.Энхтүвшин, Н.Дашдаваа нар дөрвөн даваагаар дэм боллоо. Түүнчлэн улсын начин Г.Ганжад, аймгийн арслан П.Эрхэмжаргал нар нэг давжээ.
Дорноговийн багаас аймгийн арслан М.Бямбадорж, Х.Очирхуяг нар хоёр, Б.Бадрал, Б.Батсайхан нар нэг давсан байна.
Тэгвэл “С” хэсгийн тэргүүн баг Ховдынхон Баянхонгорыг 21:4-өөр илт давуу яллаа. Ховдын баг улсын аварга О.Хангай, манлай заан Б.Пүрэвсайхан, заан Бат-Өлзий, харцага Г.Ганхуяг болон өнөө цагт шилдэг аймгийн арслангуудын тоонд яваа М.Баяржавхлан, Ц.Төмөрцоож, Ц.Батцоож нарыг эгнээндээ нэгтгэсэн. Тэд анхнаасаа илт давамгайлсан учраас сэлгээ хоёр бөхөө ашигласангүй. Улсын аварга О.Хангай, аймгийн арслан Ц.Төмөрцоож нар тав давсан бол манлай заан Б.Пүрэвсайхан, аймгийн арслан М.Баяржавхлан нар дөрөв, улсын заан Б.Бат-Өлзий гурван даваагаар багийнхаа ялалтад нэмэр болов. Тэд өнгөрсөн жил зорилгоо биелүүлж чадаагүй. Харин энэ удаа зөвхөн цом өргөх л зорилготой байгаа гэдгээ онцолсон байдаг.
Харин Баянхонгороос улсын харцага Н.Золбоо хоёр, аймгийн арслан Т.Дүүрэнсаран, Т.Баттогтох нар нэг давжээ. Гуравдугаар тойргийн сүүлчийн барилдааны дараа Баянхонгор, Төв аймгийн оноо тэнцсэн ч давааны харьцаагаар Төв аймаг илүү байсан учраас хэсгээсээ хоёрдугаар байраар шалгарлаа. Уран барилдаант залуу начин Э.Батмагнай, цэргийн арслан Г.Жамбалдорж нарын хувьд өчигдөр одгүй өдөр нь байсан бололтой. Түүнчлэн Баянхонгорынхон эхний хоёр тойрогт хүн дутуу байсан нь хол зөрүүтэй хожигдох шалтгаан болов.
Говьсүмбэр ялагдсан ч хасагдах шатанд шалгарав
“D” хэсгийг тэргүүлж буй хоёр баг гуравдугаар тойрогт хоорондоо таарлаа. Ялсан нь хэсгээ тэргүүлэх бол ялагдсан нь хоёрдугаар байраар шөвгийн наймд шалгарна. Тэгвэл эцсийн үр дүнд 14:11-ээр Өвөрхангай өрсөлдөгчөө ялснаар хэсгээ тэргүүлэв. Тэднээс багийн лидер улсын гарди Ц.Бямба-Отгон тав, харцага Б.Цэдэнсодном дөрөв давж ялалтад онцгой үүрэг гүйцэтгэлээ. Аймгийн хурц арслан О.Наранбаатар санасандаа хүрч барилдаж чадсангүй. Тэр ердөө ганцхан даваатай барилдаанаа дуусгалаа.
Тэгвэл Говьсүмбэрийн хурц арслан, багийн ахлагч Э.Мөнхбаатар өчигдөр тун хангалтгүй байлаа. Тэр ердөө ганцхан давсан. Харин аймгийн арслан М.Эрхэмбаярын сайн барилдаан тэднийг даваа ойрхон дуусахад нөлөөлсөн юм.
Алтан цомын гуравдугаар тойргийн сүүлийн барилдаан Хөвсгөл-Сэлэнгийн хооронд болсон. Хэдийгээр аль аль нь хасагдах шатанд үлдэх боломжгүй болсон эхнээсээ л өрсөлдөөнтэй байлаа. Барилдаан дуусахад 13:12-оор Хөвсгөлийн хүчтэнүүд учраагаа ялав. Хөвсгөлөөс аймгийн арслан Т.Хүрэлбаатар таван даваа авсан нь Сэлэнгийг ялахад гол үүрэг гүйцэтгэлээ. Энэ бол тэдний нэр төрийн ялалт байв. Хөвсгөл, Сэлэнгийн хувьд өмнөх тойргуудад хоёулаа Говьсүмбэрт хожигдсон байсан юм.
Шилдэг наймын оноолт
Алтан цомын хэсгийн барилдаан өндөрлөлөө. Шилдэг наймд шалгарсан багууд дараах байдлаар оноолт таарав.
Увс-Говьсүмбэр
Ховд-Баян-Өлгий
Өвөрхангай-Өмнөговь
Архангай-Төв гэж таарлаа.
Шөвгийн наймын барилдаан ирэх дөрөвдүгээр сард эхэлнэ. Харин цомын эзэн тавдугаар сард тодрох юм.
