УИХ-ын дарга Г.Занданшатар Бүгд Найрамдах Киргиз Улсын Жогорку Кенеш буюу Парламентын дарга Нурланбек Тургунбекович Шакиевийн урилгаар 2024 оны хоёрдугаар сарын 27-ноос 29-ний өдрүүдэд Бүгд Найрамдах Киргиз Улсад албан ёсны айлчлал хийж байна. Уг айлчлалын хүрээнд Монголын Хадгаламжийн Даатгалын Корпораци, Бүгд Найрамдах Киргиз Улсын Хадгаламжийн Хамгаалалтын агентлаг (Deposit Protection Agency of the Kyrgyz Republic)-тай хамтран ажиллах, харилцан ойлголцлын санамж бичиг байгууллаа.
Олон Улсын Хадгаламжийн Даатгагчдын Холбооны Евро-Ази бүсийн хорооны дарга, Хадгаламжийн даатгалын корпорацийн Гүйцэтгэх захирлын үүрэг гүйцэтгэгч С.Баатарсүрэн болон Киргиз Улсын Хадгаламжийн Хамгаалалтын Агентлагын Гүйцэтгэх захирал Кадырбек Букуев нар Банк санхүүгийн салбарт хадгаламжийн даатгалын тогтолцоог олон улсын стандартын дагуу хамтран хөгжүүлэх зорилгоор хамтын ажиллагааны санамж бичигт гарын үсэг зурсан юм. Хамтын ажиллагааны хүрээнд хадгаламжийн даатгалыг бодлогоор дэмжих хоёр талын уулзалт, мэдээлэл солилцох, хүний нөөцийг чадавхжуулах чиглэлд хамтран ажиллана.
Энэхүү арга хэмжээний дараа Киргизийн Үндэсний банкны дэд дарга Манас Жакыпов Монголбанк, Санхүүгийн зохицуулах хороо, Хадгаламжийн даатгалын корпораци, Монголын банкны холбооны удирдлага болон бусад төлөөлөгчдийг хүлээн авч уулзаж, хоёр улсын банк, санхүүгийн байгууллагуудын хамтын ажиллагааг хөгжүүлэх, санамж бичгийн хүрээнд хамтарч хэрэгжүүлэх үйл ажиллагааны талаар санал солилцлоо
